दौंड, ता. 02 : दौंड पोलीस ठाण्याच्या हद्दीतील गोपाळवाडी येथील पवारवस्ती परिसरात हातात कोयते घेऊन एकमेकांविरुद्ध फिरवत दहशत निर्माण केल्याप्रकरणी तिघांविरुद्ध दौंड पोलीस ठाण्यात गुन्हा दाखल करण्यात आला आहे. याप्रकरणी एका अल्पवयीनसह तिघांवर गुन्हा दाखल करण्यात आला आहे. ही घटना रविवारी (ता. 01) सकाळी दहाच्या सुमारास घडली.
हरीओम विश्वनाथ येडके, (वय 21, रा चोरमले वस्ती, गोपाळवाडी, ता. दौंड), निखिल संतोष पवार, वय 21, रा. पवारवस्ती गोपाळवाडी, ता. दौंड), व एक विधिसंघर्षग्रस्त बालक) अशी गुन्हा दाखल करण्यात आलेल्या तिघांची नावे आहेत. याबाबत दौंड पोलीस ठाण्यातील पोलीस शिपाई रामचंद्र नवनाथ लवटे यांनी फिर्याद दिली.
पोलिसांनी दिलेल्या माहितीनुसार, हरीओम येडके, निखिल पवार आणि एका 17 वर्षीय विधिसंघर्षग्रस्त बालक यांनी हातात कोयते घेऊन एकमेकांविरुद्ध फिरवले. या प्रकारामुळे पवारवस्ती परिसरात शांततेचा भंग होऊन दहशतीचे वातावरण निर्माण झाल्याचे फिर्यादीत नमूद आहे. पुणे ग्रामीण जिल्ह्यात शांतता व सुव्यवस्था राखण्यासाठी जिल्हाधिकाऱ्यांनी 27 ऑक्टोबर 2026 रोजी महाराष्ट्र पोलीस अधिनियम आदेश जारी केला होता. या आदेशाचे उल्लंघन केल्याचा आरोपही तिघांवर ठेवण्यात आला आहे.
दरम्यान, याप्रकरणी पोलीस शिपाई रामचंद्र लवटे यांनी दिलेल्या तक्रारीनुसार दौंड पोलीस ठाण्यात गुन्हा विविध कलमान्वये गुन्हा दाखल करण्यात आला आहे. पुढील तपास सहायक पोलीस फौजदार सय्यद करीत आहेत.
