दौंड: दौंड तालुक्यात बनावट दारूच्या (Daund News) धंद्यावर राज्य उत्पादन शुल्क विभागाने मोठा घाव घालत अवैध मद्यनिर्मितीचे संपूर्ण जाळे उघडकीस आणले आहे. 27 जानेवारी 2026 रोजी एकाच दिवशी तीन ठिकाणी करण्यात आलेल्या धडक कारवाईत बनावट दारू बनवणारी ‘फिरती फॅक्टरी’, साठवणूक केंद्रे आणि वाहतूक यंत्रणा उद्ध्वस्त करण्यात आली. या कारवाईत तब्बल 12,642 बनावट दारूच्या बाटल्या, 3,500 लिटर स्पिरीट, चार वाहने आणि दारू बनवण्याची यंत्रसामग्री असा एकूण 85 लाख 42 हजार 760 रुपये किमतीचा मुद्देमाल जप्त करण्यात आला आहे. (Pune Crime)
दौंड–अहिल्यानगर रोडवर मुंबईतील राज्य उत्पादन शुल्क विभागाच्या भरारी पथकाने एका आयशर टेम्पोची तपासणी केली असता, त्या टेम्पोमध्येच दारू तयार केली जात असल्याचे उघड झाले. चालत्या टेम्पोत स्पिरीट, स्वयंचलित बॉटलिंग मशीन आणि तयार बनावट दारू सापडली. या प्रकरणात धुळ्याचा रहिवासी सुनील प्रताप नगराळे याला अटक करण्यात आली. या कारवाईतच सर्वाधिक, म्हणजे जवळपास 59 लाख 75 हजार रुपयांचा मुद्देमाल जप्त करण्यात आला.
याच दिवशी दौंड विभागाच्या पथकाने पुणे–सोलापूर रोडवरील पांढरेवाडी परिसरात छापा टाकून ट्रॅक्टर आणि ह्युंदाई कारमधून होणारी बनावट दारूची वाहतूक उधळून लावली. या ठिकाणी मोठ्या प्रमाणावर देशी बनावट दारू सापडली. विजय जालिंदर झगडे याला अटक करण्यात आली, तर त्याचा साथीदार सोमनाथ नांदखिले फरार झाला होता. पुढील तपासात गार गाव परिसरातील एका शेताजवळील वीटभट्टीजवळ लपवून ठेवलेला आणखी दारूचा साठा सापडला आणि तेथून सोमनाथ नांदखिले यालाही अटक करण्यात आली.
या तिन्ही कारवायांत एकूण 3,500 लिटर स्पिरीट, बनावट दारूच्या हजारो बाटल्या आणि वाहने जप्त करण्यात आली असून विजय झगडे, सुनील नगराळे आणि सोमनाथ नांदखिले या तिघांविरोधात स्वतंत्र गुन्हे दाखल करण्यात आले आहेत. न्यायालयाने तिघांनाही कोठडी सुनावली आहे. या कारवाईमुळे दौंड तालुक्यातील बनावट दारूच्या व्यवसायाला मोठा धक्का बसल्याचे उत्पादन शुल्क विभागाकडून सांगण्यात आले आहे.
