पुणे : दिल्लीहून पुण्याकडे येणाऱ्या इंडिगोच्या विमानात हवेत असताना आपत्कालीन दरवाजा उघडण्याचा प्रयत्न केल्याचा धक्कादायक प्रकार समोर आला आहे. विमानातील आपत्कालीन दरवाजाच्या लिव्हरवरील कव्हर उघडण्याचा प्रयत्न एका प्रवाशाने केल्याने सेन्सर वाजू लागले. यामुळे विमानातील प्रवाशांमध्ये घबराट पसरली. या प्रकरणी विमानतळ पोलिसांनी संबंधित प्रवाशाविरुद्ध गुन्हा दाखल केला आहे.
गौरव सत्येंद्र रौतेला (वय ३३, रा. आनंद पार्क, तारादत्त पूर्व सोसायटी, सासवड) असे गुन्हा दाखल झालेल्या प्रवाशाचे नाव आहे. इंडिगो कंपनीच्या सुरक्षा विभागाचे वरिष्ठ व्यवस्थापक ओंकार विनोद कुलकर्णी (वय २८, रा. हिंजवडी) यांनी याबाबत विमानतळ पोलिसांकडे फिर्याद दिली आहे. ही घटना २ नोव्हेंबर रोजी मध्यरात्री पावणे एकच्या सुमारास दिल्ली-पुणे विमानात घडली.
पोलिसांनी दिलेल्या माहितीनुसार, गौरव रौतेला हे एका खासगी कंपनीत नोकरी करतात. ते इंडिगोच्या विमानाने दिल्लीहून पुण्याला प्रवास करत होते. विमानाने दिल्ली विमानतळावरून उड्डाण घेतल्यानंतर काही वेळातच अचानक सेन्सरचा आवाज येऊ लागला. त्यामुळे विमानातील प्रवाशांमध्ये भीतीचे वातावरण निर्माण झाले.
विमानातील वैमानिक आणि कर्मचाऱ्यांनी तपासणी केली असता, १९ बी सीटवर बसलेला प्रवासी आपत्कालीन दरवाजा उघडण्यासाठी असलेल्या लिव्हरवरील कव्हर उघडण्याचा प्रयत्न करत असल्याचे निदर्शनास आले. विमानातील इतर कर्मचाऱ्यांनी आणि प्रवाशांनी तत्काळ त्याला रोखले.
चौकशीदरम्यान संबंधित प्रवाशाने आपत्कालीन दरवाजा म्हणजे खिडकी असावी, असे समजून तो उघडण्याचा प्रयत्न केल्याचे सांगितले. मात्र, हवेत असताना विमानाच्या आपत्कालीन दरवाजाशी छेडछाड केल्याने प्रवाशांच्या सुरक्षेला धोका निर्माण होऊ शकतो. या प्रकरणी विमानतळ पोलिसांनी पुढील तपास सुरू केला आहे.
