लोणी काळभोर, ता. 3 : मुलांना शाळेत पाठवले म्हणजे पालकांची जबाबदारी संपली, असे समजत असाल तर सावध व्हा! लोणी काळभोर (ता. हवेली) येथील एका नामांकित शैक्षणिक संकुलात शिकणाऱ्या चार अल्पवयीन विद्यार्थ्यांच्या शाळेच्या बॅगेत तब्बल तीन कोयते आढळल्याने शैक्षणिक वर्तुळात खळबळ उडाली आहे. मंगळवारी (ता. ३) सकाळी विद्यार्थ्यांमध्ये झालेल्या वादातून एकमेकांवर हल्ला करण्याच्या उद्देशाने हे कोयते आणल्याची प्राथमिक माहिती समोर आली आहे.
लोणी गावातील अंबरनाथ मंदिराच्या परिसरातील आणि कदमवाकवस्ती येथील पांडवदंड परिसरातील चार विद्यार्थ्यांमध्ये काही कारणावरून वाद झाला होता. या वादातून एकमेकांना धडा शिकविण्याच्या उद्देशाने विद्यार्थी शाळेच्या बॅगेत कोयते घेऊन आल्याचे समोर आले. मात्र, वेळीच हा प्रकार उघडकीस आल्याने संभाव्य अनर्थ टळला. या घटनेची माहिती मिळताच लोणी काळभोर पोलिसांनी तातडीने हस्तक्षेप करत चारही अल्पवयीन विद्यार्थ्यांना ताब्यात घेतले.
विशेष म्हणजे, अजून शिक्षण घेण्याच्या आणि आयुष्य घडविण्याच्या वयात विद्यार्थ्यांच्या हातात पुस्तकांऐवजी कोयते येणे ही अत्यंत चिंताजनक बाब आहे. किरकोळ वादातून एकमेकांवर शस्त्राने हल्ला करण्यापर्यंत विद्यार्थ्यांची मजल जात असेल, तर त्यांच्या संगोपनासह सामाजिक वातावरणाचाही गांभीर्याने विचार करण्याची वेळ आली आहे. लोणी काळभोर पोलिसांनी विद्यार्थ्यांचे भविष्य खराब होऊ नये, या दृष्टिकोनातून त्यांना समज दिली. तसेच त्यांच्या पालकांना बोलावून मुलांच्या वर्तनाकडे लक्ष देण्याबाबत चांगलीच तंबी दिली. त्यानंतर चारही विद्यार्थ्यांना पालकांच्या स्वाधीन करण्यात आले.
पालकांनो, जबाबदारी झटकू नका!
मुलांच्या हातात महागडा मोबाईल देणे, त्यांच्या शिक्षणासाठी पैसे खर्च करणे आणि त्यांना शाळेत पाठवणे एवढेच पालकांचे कर्तव्य नाही. मुले कोणाच्या संगतीत राहतात, मोबाईलवर काय पाहतात, त्यांचे मित्र कोण आहेत, त्यांच्या वागण्यात काही बदल झाला आहे का, याकडेही पालकांनी लक्ष देणे गरजेचे आहे. अन्यथा चुकीची संगत आणि वाढती हिंसक प्रवृत्ती मुलांचे भविष्य उद्ध्वस्त करू शकते. आज शाळेच्या बॅगेत कोयता सापडला आहे; उद्या अशाच निष्काळजीपणातून एखाद्याच्या जीवावर बेतणारी घटना घडली, तर त्याला जबाबदार कोण? हा प्रश्न प्रत्येक पालकाने स्वतःला विचारण्याची गरज आहे.
