मुंबई : राष्ट्रवादी काँग्रेस पार्टी शरदचंद्र पवार पक्षाचे अध्यक्ष शरद पवार यांना मुंबईतील ब्रीच कँडी रुग्णालयात पुढील वैद्यकीय तपासण्यांसाठी दाखल करण्यात आले आहे. खासदार सुप्रिया सुळे यांनी सोशल मीडिया पोस्टद्वारे ही माहिती दिली. आज सकाळीच पुण्यातील रुबी हॉल क्लिनिकमधून डिस्चार्ज मिळाल्यानंतर पवार यांना मुंबईत आणण्यात आले.
शरद पवार यांना वातावरणातील बदलामुळे छातीत कफ आणि अशक्तपणा जाणवू लागला होता. डॉक्टरांनी त्यांना विश्रांती घेण्याचा सल्ला दिला होता. दरम्यान, ते दुष्काळ पाहणी दौऱ्यावर असताना प्रकृती बिघडल्याने त्यांचा दौरा रद्द करण्यात आला. त्यानंतर त्यांना पुण्यातील रुबी रुग्णालयात उपचारांसाठी दाखल करण्यात आले होते.
दोन दिवस उपचार घेतल्यानंतर आज सकाळी त्यांना रुग्णालयातून डिस्चार्ज देण्यात आला. यावेळी पवार यांना व्हीलचेअरवरून बाहेर आणण्यात आले. त्यांनी उपस्थित कार्यकर्त्यांना हात उंचावून अभिवादन केले. त्यानंतर खासदार सुप्रिया सुळे यांच्यासोबत ते मुंबईच्या दिशेने रवाना झाले.
रुबी रुग्णालयातून डिस्चार्ज मिळाल्यानंतर शरद पवार यांना पुढील तपासण्यांसाठी मुंबईतील ब्रीच कँडी रुग्णालयात दाखल करण्यात येत असल्याचे सुप्रिया सुळे यांनी सोशल मीडिया पोस्टद्वारे स्पष्ट केले. त्यांच्या प्रकृतीबाबत कार्यकर्ते आणि समर्थकांकडून चिंता व्यक्त केली जात आहे.
पंतप्रधान नरेंद्र मोदी यांनी फोन करून शरद पवार यांच्या प्रकृतीची विचारपूस केली. पवार यांचे निकटवर्तीय विठ्ठल मणियार यांनी ही माहिती दिली. यावेळी पंतप्रधान मोदी यांनी पवार यांना प्रकृतीची काळजी घेण्याचे आणि आवश्यक विश्रांती घेण्याचे आवाहन केले.
