पुणे : सातारा रस्त्यावरील बीआरटी मार्गात ज्येष्ठ महिला समोरून येताना दिसल्याने पीएमपी बसचालकाने अचानक ब्रेक दाबला. यामुळे बसवरील नियंत्रण सुटून बस थेट अहिल्यादेवी बसथांब्यावर आदळली. या अपघातात बसमधील आठ प्रवासी जखमी झाले असून, त्यांपैकी दोघांची प्रकृती गंभीर आहे. जखमींवर रुग्णालयात उपचार सुरू असून, सहकारनगर पोलिसांनी बसचालक आणि वाहकाला ताब्यात घेतले आहे.
पोलिसांनी दिलेल्या माहितीनुसार, कोथरूड ते कात्रज मार्गावरील पीएमपी बस दुपारी सव्वाचारच्या सुमारास शंकर महाराज मठाजवळील बसथांब्याकडे जात होती. त्यावेळी बीआरटी मार्गातून एक ज्येष्ठ महिला बसच्या दिशेने येताना चालकाला दिसली. महिलेला वाचवण्यासाठी चालकाने तातडीने ब्रेक दाबला. मात्र, अचानक ब्रेक लावल्याने बसवरील नियंत्रण सुटले आणि बस अहिल्यादेवी बसथांब्यावर जाऊन आदळली.
या अपघातात बसमधील पाच महिला आणि तीन पुरुष प्रवासी जखमी झाले आहेत. काही प्रवाशांचे दात पडले, तर काहींचे ओठ फाटल्याची माहिती समोर आली आहे. जखमींमध्ये दोघांची प्रकृती गंभीर असून, त्यांच्यावर वैद्यकीय उपचार सुरू आहेत. विशेष म्हणजे, बसथांब्यावर उभ्या असलेल्या प्रवाशांना या अपघातात कोणतीही दुखापत झाली नाही.
अपघाताची माहिती मिळताच सहकारनगर पोलिसांनी घटनास्थळी धाव घेतली. बसचालक आणि वाहकाला ताब्यात घेण्यात आले असून, या प्रकरणी रात्री उशिरापर्यंत गुन्हा दाखल करण्याची प्रक्रिया सुरू होती. अपघाताची नेमकी कारणे आणि पुढील तपास सहकारनगर पोलिसांकडून केला जात आहे.
