लोणी काळभोर येथील सराईत मटका जुगार चालक विनोद झेंडे दोन वर्षांसाठी हद्दपार!

लोणी काळभोर, ता. 3 : पोलिसांच्या वारंवार प्रतिबंधात्मक कारवाईनंतरही बेकायदेशीर मटका जुगाराचा व्यवसाय सुरू ठेवणाऱ्या लोणी काळभोर येथील सराईत आरोपी विनोद साहेबराव झेंडे (वय 44, रा. इंदिरानगर, लोणी स्टेशन, ता. हवेली) याला पुणे शहर पोलिसांनी दोन वर्षांसाठी हद्दपार केले आहे. अशी माहिती लोणी काळभोर पोलीस ठाण्याचे वरिष्ठ पोलीस निरीक्षक प्रदीप पवार यांनी दिली आहे. लोणी काळभोर पोलिसांच्या कारवाईमुळे अवैध धंदेचालकांचे धाबे दणाणले आहेत.

पोलिसांनी दिलेल्या माहितीनुसार, पुणे शहरातील कायदा व सुव्यवस्था अबाधित राखण्यासाठी तसेच नागरिकांच्या सुरक्षिततेच्या दृष्टीने पोलीस आयुक्त अमितेश कुमार यांनी सराईत गुन्हेगार आणि अवैध धंदेचालकांविरोधात कठोर कारवाई करण्याचे आदेश दिले आहेत. त्यानुसार शहरातील मटका-जुगार, गावठी हातभट्टीची दारू विक्री, अंमली पदार्थांची तस्करी तसेच नागरिकांमध्ये दहशत निर्माण करणाऱ्या गुन्हेगारांवर पोलिसांकडून विशेष लक्ष ठेवण्यात येत आहे.

याच पार्श्वभूमीवर लोणी काळभोर
पोलीस ठाण्याच्या हद्दीतील विनोद झेंडे हा पोलिसांच्या अभिलेखावरील सराईत मटका जुगार चालक असल्याचे समोर आले होते. त्याच्यावर यापूर्वी प्रतिबंधात्मक कारवाई करण्यात आली होती. मात्र, या कारवाईला न जुमानता त्याने पुन्हा बेकायदेशीर मटका जुगाराचा व्यवसाय सुरूच ठेवल्याचा आरोप आहे. या अवैध धंद्यामुळे सर्वसामान्य नागरिकांचे आर्थिक नुकसान होत असून, अनेक कुटुंबांच्या संसारावर त्याचे विपरीत परिणाम होत असल्याचे पोलिसांनी नमूद केले आहे.
या आरोपीच्या कृत्यांना आळा घालण्यासाठी लोणी काळभोर पोलीस ठाण्याचे वरिष्ठ पोलीस निरीक्षक प्रदीप पवार यांनी हद्दपारीचा प्रस्ताव तयार करून पोलीस उपायुक्त, परिमंडळ-६ यांच्याकडे पाठविला होता. या प्रस्तावाची दखल घेत पोलीस उपायुक्त जीवन बेनीवाल यांनी विनोद झेंडे याला दोन वर्षांच्या कालावधीसाठी हद्दपार करण्याचे आदेश पारित केले आहेत.

अवैध धंदेचालकांविरोधात कारवाई सुरूच राहणार!
ही कारवाई पोलीस उपायुक्त जीवन बेनीवाल, सहायक पोलीस आयुक्त अनुराधा उदमले यांच्या मार्गदर्शनाखाली वरिष्ठ पोलीस निरीक्षक प्रदीप पवार, पोलीस निरीक्षक (गुन्हे) नंदकुमार कोळी, पोलीस हवालदार विलास शिंदे, महिला पोलीस हवालदार स्वाती पिसाळ, पोलीस अंमलदार प्रशांत नरसाळे आणि तपास पथकातील पोलीस अंमलदार राहुल कर्डिले यांनी केली.

दरम्यान, लोणी काळभोर पोलीस ठाण्याच्या हद्दीत बेकायदेशीर धंदे करणाऱ्या आणि सार्वजनिक सुव्यवस्थेला बाधा निर्माण करणाऱ्या सराईत गुन्हेगारांविरोधात यापुढेही कठोर कारवाई करण्यात येणार असल्याचा इशारा पोलिसांनी दिला आहे.