पुणे : बंगालच्या उपसागरातील तीव्र ‘मुरासू’ चक्रीवादळ आणि अरबी समुद्रातील चक्रीय स्थितीमुळे पुणे शहरासह परिसरात पुन्हा पावसासाठी पोषक वातावरण निर्माण झाले आहे. रविवार रात्रीपासून सुरू झालेल्या पावसाने सोमवारी (२ नोव्हेंबर) सकाळी आणि दुपारीही शहरातील विविध भागांत हजेरी लावली. या अवकाळी पावसामुळे शहराच्या कमाल तापमानात एकाच दिवसात सुमारे आठ अंश सेल्सिअसने घट झाल्याने वातावरणात गारवा निर्माण झाला आहे.
भारतीय हवामानशास्त्र विभागाने पुणे परिसरात हलक्या ते मध्यम स्वरूपाचा पाऊस पडण्याची शक्यता व्यक्त केली आहे. तसेच काही ठिकाणी मेघगर्जना आणि विजांच्या कडकडाटासह पाऊस पडण्याचा अंदाज वर्तवण्यात आला आहे. त्यामुळे नागरिकांनी बाहेर पडताना आवश्यक ती खबरदारी घेण्याचे आवाहन करण्यात येत आहे.
पुणे जिल्ह्यासाठी २ नोव्हेंबर रोजी यलो अलर्ट जारी करण्यात आला होता. मात्र, ३ आणि ४ नोव्हेंबरच्या अद्ययावत हवामान इशाऱ्यांमध्ये पुणे जिल्ह्याचा समावेश करण्यात आलेला नाही. तरीही शहरात पावसाची शक्यता कायम असल्याने हवामानातील बदलांकडे लक्ष देण्याची गरज आहे.
गेल्या काही दिवसांपासून जाणवणाऱ्या उकाड्यामुळे नागरिक हैराण झाले होते. मात्र, अवकाळी पावसाने कमाल तापमानात एका दिवसात सुमारे आठ अंश सेल्सिअसची घट नोंदवली गेल्याने वातावरणात लक्षणीय बदल झाला आहे. पावसामुळे हवेत गारवा निर्माण झाला असून, पुणेकरांना उन्हाच्या तीव्रतेपासून काहीसा दिलासा मिळाला आहे.
