पुणे : भोर तालुक्यात अल्पवयीन मुलीचा विनयभंग केल्याचा धक्कादायक प्रकार समोर आला आहे. या प्रकरणी मुलीच्या वडिलांनी पोलिसांत तक्रार दाखल केल्यानंतर भोर पोलीस ठाण्यात पॉक्सो कायद्यांतर्गत गुन्हा नोंदवण्यात आला आहे. पोलिसांनी आरोपी तरुणाला ताब्यात घेतले असून, या प्रकरणाचा पुढील तपास सुरू आहे.
मिळालेल्या माहितीनुसार, संतोष दत्तू धोत्रे असे आरोपीचे नाव आहे. संबंधित तरुण गेल्या चार महिन्यांपासून अल्पवयीन मुलीला त्रास देत असल्याचा आरोप आहे. मुलीच्या घरात कोणी नसताना आरोपी वारंवार तिच्या घरी जात असल्याचे तक्रारीत नमूद करण्यात आले आहे.
या काळात आरोपीने मुलीला अश्लील व्हिडिओ दाखविल्याचा आरोप करण्यात आला आहे. त्यानंतर त्याने मुलीवर जबरदस्ती केल्याचेही सांगितले जात आहे. या प्रकाराला विरोध केल्यास जीवे मारण्याची धमकी आरोपीने दिल्याचा आरोप आहे. त्यामुळे घाबरलेल्या मुलीने काही काळ हा प्रकार कोणालाही सांगितला नाही.
मात्र, भीतीचे वातावरण निर्माण झाल्यानंतर अखेर पीडित मुलीने आपल्या कुटुंबीयांना घडलेला प्रकार सांगितला. मुलीने दिलेली माहिती ऐकल्यानंतर तिच्या वडिलांनी तातडीने भोर पोलीस ठाणे गाठले. तेथे आरोपीविरोधात तक्रार दाखल करण्यात आली.
तक्रारीची दखल घेत भोर पोलिसांनी आरोपी संतोष दत्तू धोत्रे याच्याविरोधात पॉक्सो कायद्यांतर्गत गुन्हा दाखल केला आहे. पोलिसांनी आरोपीला ताब्यात घेतले असून, घटनेची सविस्तर चौकशी सुरू आहे.
