दौंड: दौंड तालुक्यातील नागरिकांच्या महसूल आणि इतर शासकीय कामांचा जलद निपटारा करण्यासाठी महसूल विभागाच्या वतीने शुक्रवारी, 31 जुलै रोजी “श्री छत्रपती शिवाजी महाराज महसूल समाधान शिबिर” आयोजित करण्यात आले आहे. बोरीपार्धी येथील श्री बोरमलनाथ मंदिर सभागृहात सकाळी 10 वाजता या शिबिराला सुरुवात होणार असून विविध शासकीय योजनांचा लाभ एकाच ठिकाणी नागरिकांना उपलब्ध करून देण्यात येणार आहे.
मुख्यमंत्री यांच्या वाढदिवसानिमित्त तसेच माजी उपमुख्यमंत्री स्व. अजितदादा पवार यांच्या प्रथम जयंतीनिमित्त या शिबिराचे आयोजन करण्यात आले आहे. या कार्यक्रमाच्या अध्यक्षस्थानी दौंड विधानसभा मतदारसंघाचे आमदार ॲड. राहुलदादा कुल उपस्थित राहणार आहेत. तसेच महसूल विभागासह तालुक्यातील विविध शासकीय विभागांचे अधिकारी आणि विभागप्रमुख नागरिकांच्या समस्या ऐकून त्यांचे निराकरण करण्यासाठी उपस्थित राहतील.
या शिबिरात महिला शेतकरी दर्जा प्रमाणपत्रांचे वितरण, स्वामित्व योजनेअंतर्गत गावठाणातील मालकी हक्काच्या सनदांचे वाटप, मुख्यमंत्री बळीराजा शेत-पाणंद रस्ते योजना, शासकीय जमिनीवरील निवासी अतिक्रमण नियमितीकरण, ‘जिवंत सातबारा’ मोहीम आणि राजमाता जिजाऊ महिला सक्षमीकरण योजनेचा लाभ दिला जाणार आहे.
याशिवाय घरकुल लाभार्थ्यांसाठी विशेष सवलती, कुंभार समाजासाठी पारंपरिक व्यवसायाशी संबंधित सुविधा, शेतजमिनीच्या कौटुंबिक वाटणीपत्रावरील नोंदणी शुल्क माफी, संजय गांधी योजनेचे लाभ वितरण, जातीचे व इतर विविध दाखल्यांचे वितरण, महसुली प्रकरणांचा निपटारा, फार्मर आयडी नोंदणी व अद्ययावतीकरण, शेतकरी कर्जमाफीसाठी ई-केवायसी, आधार अद्ययावतीकरण तसेच कृषी, सहकार आणि इतर विभागांच्या योजनांचे लाभही नागरिकांना उपलब्ध करून दिले जाणार आहेत. दौंड तालुक्यातील नागरिकांनी या शिबिरात मोठ्या संख्येने सहभागी होऊन विविध शासकीय सेवांचा लाभ घ्यावा, असे आवाहन प्रशासनाने केले आहे.
