पुणे: घरातील ज्येष्ठ व्यक्तीची सेवा करण्यासाठी ठेवलेल्या कर्मचाऱ्यावर विश्वास ठेवणे पुण्यातील एका कुटुंबाला चांगलेच महागात पडले. घरातील मंडळी काही काळासाठी बाहेर गेल्यानंतर केअरटेकरने घरातील कपाटातून रोख रक्कम आणि इतर मौल्यवान वस्तू घेऊन तेथून पळ काढला. विशेष म्हणजे, चोरीनंतर तो पुन्हा कामावर परतलाच नाही.
मंगळवार पेठेतील रणजित कॉम्प्लेक्स सोसायटीमध्ये ही घटना घडली आहे. याप्रकरणी समर्थ पोलीस ठाण्यात तक्रार नोंदवण्यात आली असून, संबंधित केअरटेकरचा शोध घेण्यासाठी पोलिसांकडून तपास सुरू आहे.
तक्रारदाराच्या वडिलांना प्रकृतीच्या कारणामुळे नियमित देखभालीची गरज होती. त्यामुळे त्यांच्या सेवेसाठी एका कर्मचाऱ्याची नियुक्ती करण्यात आली होती. काही दिवसांपूर्वी कुटुंबातील सदस्य कामानिमित्त बाहेर गेले असताना घरात केअरटेकर एकटाच होता. याच संधीचा फायदा घेत त्याने कपाट उघडून त्यातील 70 हजार रुपये रोख आणि इतर मौल्यवान वस्तू असा सुमारे 77 हजार रुपयांचा मुद्देमाल चोरल्याचा आरोप आहे.
कुटुंबीय घरी परतल्यानंतर काही वेळातच त्यांना केअरटेकर कामावर येत नसल्याचे लक्षात आले. त्याच्याशी संपर्क साधण्याचा प्रयत्न केला असता तो अचानक गायब झाल्याचे समोर आले. त्यामुळे कुटुंबीयांचा संशय अधिकच वाढला. घरातील कपाट तपासल्यानंतर रोख रक्कम आणि मौल्यवान वस्तू नसल्याचे आढळले. या प्रकरणी तक्रार दाखल करण्यात आली असून पोलीस उपनिरीक्षक बालाजी पावणे यांच्या मार्गदर्शनाखाली या प्रकरणाचा तपास सुरू आहे.
