नाशिक : प्रियकरासोबत लग्न लावून देण्याचे आश्वासन देत एका महिलेची आर्थिक फसवणूक केल्याचा धक्कादायक प्रकार नाशिकमध्ये समोर आला आहे. लग्न जमवण्यासाठी अघोरी पूजा करण्याच्या नावाखाली महिलेकडून 77 हजार रुपये घेतल्याचा आरोप आहे. या प्रकरणी विशाल खडांगळे आणि त्याचा साथीदार जितू पवार यांना पोलिसांनी अटक केली आहे.
ही घटना नाशिकमधील अमरधाम स्मशानभूमीत घडल्याची माहिती आहे. महिलेच्या म्हणण्यानुसार, तिला मध्यरात्री स्मशानभूमीत नेऊन काही विधी करण्यात आले. यावेळी लिंबू, लाह्या, तांदूळ आणि कुंकू यांचा वापर करण्यात आल्याचा आरोप आहे. जळालेल्या मृतदेहाची राख आणि इतर वस्तू महिलेच्या अंगावर टाकल्याचेही तिने सांगितले.
पीडित महिला गुजरातमधील वलसाड येथील रहिवासी असून, तिचे जितू पवारसोबत सुमारे 4 वर्षांपासून प्रेमसंबंध असल्याचे तिने पोलिसांना सांगितले. दोघांचे लग्न होणार असल्याचे तिला वाटत होते. मात्र, नंतर प्रियकराने लग्नास नकार दिला. त्यानंतर लग्न जमवून देण्याचे आश्वासन देत महिलेला विशाल खडांगळे याच्याकडे नेण्यात आल्याचा आरोप आहे.
लग्नासाठी पूजा केल्यानंतरही अपेक्षित परिणाम झाला नाही. त्यामुळे महिलेने दिलेले पैसे परत मागितले. यावेळी तिला आणखी पैसे देण्यास सांगण्यात आले. तसेच पैसे परत मागितल्यास जीवे मारण्याची धमकी देण्यात आल्याचा आरोप महिलेने केला आहे. तसेच जितू पवारने मारहाण केल्याचेही तिने सांगितले.
या प्रकरणात भद्रकाली पोलीस ठाण्यात तक्रार दाखल करण्यात आली. पोलिसांनी जादूटोणाविरोधी कायद्यासह अन्य संबंधित कलमांनुसार गुन्हा दाखल केला आहे. अंनिसच्या माहितीनुसार, नाशिकमध्ये भोंदूगिरीशी संबंधित हा 12वा गुन्हा असल्याचा दावा करण्यात आला आहे. या प्रकरणाचा पुढील तपास पोलीस करत आहेत.
