लोणी काळभोर : मागील 5 वर्षापासून जनसेवा क्लिनिक या नावाने बोगस दवाखाना थाटून नागरिकांना लुटणाऱ्या कदमवाकवस्ती (ता. हवेली) येथील एका बोगस डॉक्टरला अटक करण्यात आली आहे. एका खासगी रुग्णालयात कंपाऊंडर म्हणून काम करणाऱ्या महाभागाने डॉक्टर असल्याचे भासवत थेट स्वत:चा दवाखानाच थाटला. मागील चार ते पाच वर्षांपासून तो वैद्यकीय व्यवसाय करीत होता. जिल्हा आरोग्य विभागाला याबाबत माहिती मिळताच याविषयी पोलिसांच्या मदतीने कारवाई करण्यात आली. या तोतया डॉक्टरला अटक करण्यात आली असून न्यायालयाने त्याला १६ जुलैपर्यन्त पोलीस कोठडी सुनावली आहे.
प्रकाश रंगनाथ तोरणे (वय-६३, सध्या रा. कदमवाकवस्ती, ता. हवेली. मूळ रा. पढेगाव, ता. श्रीरामपूर, जि. नगर) असे गुन्हा दाखल झालेल्या बोगस डॉक्टरचे नाव आहे. याप्रकरणी डॉ. रुपाली रघुनाथराव भंगाळे (वय-३८, रा. काळेपडळ, हडपसर, पुणे) यांनी लोणी काळभोर पोलीस ठाण्यात फिर्याद दिली होती.
पोलिसांनी दिलेल्या माहितीनुसार, डॉ. रुपाली भंगाळे या लोणी काळभोर येथील प्राथमिक आरोग्य केंद्रात वैद्यकीय अधिकारी म्हणून काम करतात. डॉ. भंगाळे या नेहमीप्रमाणे गुरुवारी आरोग्य केंद्रात रुग्णांची तपासणी करीत होत्या. तेव्हा हवेली तालुका आरोग्य अधिकारी डॉ. सुरेश गोरे यांचा डॉ. भंगाळे यांना फोन आला की, कदमवाकवस्ती ग्रामपंचायत हद्दीतील पांडवदंड रस्त्यावर इसम नामे प्रकाश तोरणे याच्याजवळ वैद्यकीय व्यवसायासाठी लागणारे साहीत्य व औषध गोळ्या विनापरवाना बाळगून आहे. स्वत: डॉक्टर असल्याची बतावणी करून नागरिकांना जनसेवा क्लिनिक या दवाखान्यात विक्री करीत असल्याची माहिती मिळाली.
त्या माहितीची खातरजमा करण्यासाठी, विस्तार अधिकारी डॉ. महेश वाघमारे, डॉ. रुपाली भंगाळे व समुदय आरोग्य अधिकारी डॉ. मनोज उबरे हे लोणी काळभोर पोलिसांना घेऊन सदर ठिकाणी गेले. प्रकाश तोरणे यांना डॉक्टर असल्याबाबत व औषध-गोळया विक्रीबाबत महाराष्ट्र कौंसिल ऑफ मेडीसिन या परिषदेचे प्रमाणपत्राबाबत विचारणा केली.
तेव्हा तोरणे यांनी उडवाउडवीची उत्तरे दिली. त्याच्याकडे अधिक चौकशी केली असता तो डॉक्टर असल्याचे कोणतीही शैक्षणीक पात्रता अथवा पदवी नसल्याचे समोर आले. तसेच प्रत्येक रुग्णाच्या पाठीमागे ७५ ते १०० रुपये फी घेत असल्याचे तोरणे याने कबुली दिली. त्यानंतर पोलिसांनी त्याच्याजवळील वैद्यकीय व्यवसायासाठी लागणारे साहित्य व औषध गोळ्या जप्त करून दवाखाना सील केला असून त्याच्यावर कारवाई करण्यात आली.
तोरणेवर गुन्हा दाखल करून त्याला ताब्यात घेण्यात आले. त्याच्याकडे केलेल्या चौकशीत तो डॉक्टर नसल्याचे निष्पन्न झाले. त्याने तशी कबुली पोलिसांना दिली. त्याला अटक करून न्यायालयात हजर करण्यात आले. न्यायालयाने त्याला १६ जुलैपर्यंत पोलीस कोठडी सुनावली. पुढील तपास सहायक निरीक्षक किशोर पवार करीत आहेत.
