भिगवण, (पुणे) : आपल्या वृद्ध आईचा शोध घेण्यासाठी घराला कुलूप लावून बाहेर गेले असताना अज्ञात चोरट्यांनी मुख्य दरवाजाचे कुलूप तोडून घरातील रोख रक्कमेसह एकूण 6 लाख 33 हजार 538 रुपयांचा मुद्देमाल लंपास केला. कुंभारगाव (ता. इंदापूर) येथे गुरुवारी (ता. 04) हि घटना घडली.
याबाबत जय महादेव ढोले (वय ४७, व्यवसाय: शेती व किराणा दुकान, रा. कुंभारगाव, ता. इंदापूर) यांनी भिगवण पोलीस ठाण्यात फिर्याद दिली आहे. त्यानुसार अज्ञात चोरट्यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी संजय ढोले यांची पत्नी व मुलगा 30 एप्रिलला संभाजीनगर येथे एका कार्यक्रमासाठी गेले होते, तर आई बारामती येथे मोठ्या भावाकडे राहण्यास गेली होती, त्यामुळे संजय ढोले हे घरी एकटेच होते. गुरुवारी दुपारी संजय यांच्या मोठ्या भावाने फोन करून सांगितले की, “आई पार्किंगमध्ये बसते असे सांगून बाहेर गेली आहे, ती अद्याप घरी आली नाही;
ती कुंभारगावला आली का?” आई बेपत्ता झाल्याचे समजताच संजय ढोले हे आईला शोधण्यासाठी प्रथम भिगवण आणि त्यानंतर बारामती येथे गेले. आईचा शोध सुरू असतानाच, रात्री आठ वाजता आई उरुळी कांचन येथे सुखरूप पोहोचल्याची माहिती नातेवाईकांकडून मिळाली.आईचा शोध लागल्याने संजय ढोले हे भावाकडे जेवण करून रात्री साडेअकरा वाजण्याच्या सुमारास आपल्या कुंभारगाव येथील घरी परतले. मात्र, घरी पोहोचताच त्यांना घराच्या मुख्य दरवाजाचे कुलूप कोणीतरी अज्ञात वस्तूने तोडून खाली टाकल्याचे दिसले.
संजय ढोले यांनी घरात प्रवेश करून पाहिले असता, घरातील लाकडी कपाटाचे दार उघडे असून आतील सर्व सामान अस्ताव्यस्त पडले होते. कपाटातील स्टीलच्या डब्यात ठेवलेले 4 लाख 48 हजार 538 रुपये किमतीचे सोन्याचे दागिने व महिला बचत गटाची जमा असलेली दीड लाख रुपये रोख रक्कम व वैयक्तिक घरखर्चासाठी ठेवलेले 35 हजार व इतर असा 6 लाख 33 हजार 538 रुपयांचा मुद्देमाल चोरून नेल्याचे दिसून आले.
दरम्यान, याबाबत संजय ढोले यांनी दिलेल्या फिर्यादीवरून अज्ञात चोरट्याविरुद्ध विविध कलमान्वये गुन्हा दाखल करण्यात आला आहे. पोलीस उपनिरीक्षक अमित पाटील पुढील तपास करीत आहेत.
