बारामती: बारामती तालुक्यातील तांदुळवाडी परिसरात (Baramati News) प्रेमी युगलावर कोयत्याने हल्ला करून लूट करणाऱ्या आरोपीला अखेर पोलिसांनी अटक केली आहे. बारामती तालुका पोलिसांच्या सापळ्यात हा आरोपी जेरबंद झाला असून त्याच्याकडून सोन्याची साखळी जप्त करण्यात आली आहे. (Baramati Crime)
ही घटना 16 जून 2025 रोजी सायंकाळी सुमारे 6.45 वाजण्याच्या सुमारास तांदुळवाडी येथील एलसी कंपनी लेक परिसरात घडली होती. पीडित तरुण (वय 22, रा. मार्केटयार्ड, बारामती) हा आपल्या मैत्रिणीसोबत मोकळ्या जागेत बसला असताना मोटारसायकलवरून आलेल्या दोन अज्ञात इसमांनी त्यांच्यावर हल्ला केला. आरोपींनी तोंडाला रुमाल बांधून मोबाईल आणि पैसे देण्याची मागणी केली. विरोध केल्याने एका आरोपीने लोखंडी कोयत्याने तरुणाच्या पायावर वार करत त्याला जखमी केले.
यानंतर आरोपींनी जबरदस्तीने 2500 रुपये रोख, मोबाईल आणि तरुणीच्या गळ्यातील सुमारे 50000 रुपये किमतीची सोन्याची साखळी हिसकावून घेतली. तसेच मोटारसायकलची चावी घेऊन ते घटनास्थळावरून पसार झाले होते.
या प्रकरणी गुन्हा दाखल झाल्यानंतर पोलिसांनी तपास सुरू केला. गोपनीय माहितीच्या आधारे अजय नंदकुमार सकट (रा. तांदुळवाडी) याला 15 एप्रिल 2026 रोजी अटक करण्यात आली. त्याच्याकडून सुमारे 4.900 ग्रॅम वजनाची आणि अंदाजे 50000 रुपये किमतीची सोन्याची साखळी जप्त करण्यात आली आहे.
ही कारवाई चंद्रशेखर यादव यांच्या मार्गदर्शनाखाली युवराज पाटील आणि त्यांच्या पथकाने केली. तसेच सुरेंद्र वाघ, भारत खारतोडे, मनोज पवार, नितीन ढवाण, निलेश वाकळे, राजू बन्ने आणि शाहरुख शेख यांनी या कारवाईत सहभाग घेतला. पुढील तपास पोलीस उपनिरीक्षक युवराज पाटील आणि राजू बन्ने करत आहेत.
