बारामती : बारामती तालुक्यातील सुपा परिसरात एका 25 ते 27 वर्ष वयोगटातील तरुणीची अत्यंत अमानुषपणे हत्या करून तिचा मृतदेह नग्न अवस्थेत रस्त्याच्या कडेला फेकून दिल्याची घटना उघडकीस आली आहे. सुपे गावालगत असलेल्या काळखरेवाडी हद्दीतील खैरेपडळ परिसरात सोमवारी (ता. 19) पहाटे हि घटना उघडकीस आली आहे.
घटनेची माहिती मिळताच सुपा पोलीस ठाण्याचे अधिकारी व कर्मचारी तातडीने घटनास्थळी दाखल झाले. रस्त्यालगत रक्ताच्या थारोळ्यात पडलेला तरुणीचा मृतदेह पाहून नागरिक सुन्न झाले. प्राथमिक तपासात अंदाजे 25 ते 27 वयोगटातील या तरुणीवर अनोळखी व्यक्तीने धारदार शस्त्राने अत्यंत क्रूर हल्ला करून खून केल्याचे स्पष्ट झाले आहे.
खून केल्यानंतर आरोपीने पुरावे नष्ट करण्याच्या उद्देशाने मृतदेह रस्त्याच्या कडेला टाकून पळ काढल्याचा संशय पोलिसांनी व्यक्त केला आहे. या प्रकरणी सुपा पोलीस ठाण्यात खुनाचा गुन्हा दाखल करण्यात आला आहे. घटनास्थळी फॉरेन्सिक तज्ज्ञ व श्वानपथक बोलावण्यात आले असून, आरोपीच्या शोधासाठी पोलिसांची पाच स्वतंत्र पथके तयार करण्यात आली आहेत. दरम्यान, हत्या नेमकी का केली? याबद्दल अधिक माहिती अद्याप समोर आलेली नाही.
दरम्यान, परिसरातील सीसीटीव्ही फुटेज, मोबाईल डेटा आणि आधुनिक तांत्रिक साधनांच्या आधारे तपास वेगाने सुरू असल्याची माहिती अप्पर पोलीस अधीक्षक गणेश बिरादार यांनी दिली. या भीषण घटनेचा पुढील तपास सहाय्यक पोलीस निरीक्षक मनोजकुमार नवसरे करत आहेत.
