हडपसर, ता. 23 : गणेश विसर्जन मिरवणूक पारंपरिक, शिस्तबद्ध आणि संस्कृतीचे दर्शन घडविणारी कशी असावी, याचे उत्तम उदाहरण हडपसर पोलिसांनी यंदा घालून दिले. हडपसर पोलिस ठाण्याच्या वतीने भव्य विसर्जन मिरवणुकीचे आयोजन मंगळवारी (ता. 22) करण्यात आले होते. शंखनाद, ढोलपथक, शौर्य पथक, तुतारी आणि सनईच्या मंगलमय स्वरांनी परिसर दुमदुमून गेला. या मिरवणुकीचे प्रमुख आकर्षण ठरले ते केशव शंखनाद पथकाचे शंखवादन. पारंपरिक शंखनादाच्या माध्यमातून नागरिकांना भारतीय संस्कृतीचे दर्शन घडविण्यात आले. शंखनादाच्या माध्यमातून गणरायाला भावपूर्ण निरोप देण्यात आला.
केशव शंखनाद पथक हे पुण्यातील प्रसिद्ध सांस्कृतिक व सामाजिक पथक असून, शंखवादनाच्या पारंपरिक कलेचे जतन आणि प्रसार करण्याचे काम करते. या पथकाने एकाच वेळी मोठ्या संख्येने शंखवादक सहभागी करून शंखवादनाचा विश्वविक्रम नोंदविल्याची माहिती देण्यात आली. विविध मानाच्या गणेशोत्सव मंडळांच्या मिरवणुका आणि धार्मिक कार्यक्रमांमध्येही या पथकाचे शंखवादन झाले आहे.
मिरवणुकीदरम्यान शंखनादाचे धार्मिक, सांस्कृतिक तसेच आरोग्याच्या दृष्टीने असलेले महत्त्व नागरिकांना समजावून सांगण्यात आले. शंखवादनामुळे श्वसनक्रियेला चालना मिळण्यासह मानसिक शांतता मिळण्यास मदत होते, असा संदेशही देण्यात आला. यासोबतच शौर्य पथकाच्या सादरीकरणातून महिला सक्षमीकरणाचा संदेश देण्यात आला. महिलांनी सादर केलेल्या विविध प्रात्यक्षिकांनी उपस्थितांचे लक्ष वेधून घेतले. महाराष्ट्रीयन पारंपरिक पेहराव, तुतारी आणि सनईचे वादन यामुळे मिरवणुकीला विशेष पारंपरिक रंगत आली.
दरम्यान, हडपसर पोलिसांनी आयोजित केलेल्या या विसर्जन मिरवणुकीत उत्सवाचा आनंद, भारतीय संस्कृतीचे संवर्धन, महिला सक्षमीकरण आणि सामाजिक प्रबोधन यांचा सुंदर संगम पाहायला मिळाला. पारंपरिक वाद्यांच्या निनादात आणि भक्तिमय वातावरणात गणरायाला भावपूर्ण निरोप देण्यात आला.
