पुणे: पुणे शहरावर सध्या पाणीटंचाईचे सावट असून महापालिकेने दिवसाआड पाणीपुरवठा करण्याचा निर्णय घेतला आहे. या कठीण काळात नागरिकांनी पाण्याचा वापर अत्यंत जपून करणे आवश्यक आहे. तरीही, काही ठिकाणी पिण्याच्या पाण्याचा दुरुपयोग होत असल्याचे समोर आले आहे. ही बाब गांभीर्याने घेत पुणे महानगरपालिकेने आता कडक धोरण अवलंबले असून, पिण्याचे पाणी इतर अनावश्यक कामांसाठी वापरल्यास संबंधित व्यक्ती किंवा आस्थापनेवर थेट दंडात्मक कारवाई केली जाणार आहे, असा इशारा प्रशासनाने दिला आहे.
पाणीबचतीसाठी महापालिकेच्या अतिरिक्त आयुक्त पवनीत कौर यांनी माहिती दिली की, पाण्याचा अपव्यय रोखण्यासाठी शहरात विशेष पथके तैनात करण्यात आली आहेत. ही पथके पुढील 4 दिवसांत विविध भागांत पाहणी करतील आणि नियमांचे उल्लंघन करणाऱ्यांवर कडक कारवाई करतील.
हवामान विभागाने 20 जूननंतर पावसाची शक्यता वर्तवली आहे. पाऊस समाधानकारक झाला तर हे पाणीसंकट लवकरच दूर होऊ शकते; मात्र पावसाला विलंब झाल्यास नागरिकांना पुढील वर्षभर पाणीकपातीचा सामना करावा लागू शकतो, अशी शक्यता सूत्रांनी व्यक्त केली आहे.
