नांदेड: पंजाबचे माजी उपमुख्यमंत्री आणि शिरोमणी अकाली दलाचे अध्यक्ष सुखबीर सिंह बादल यांच्यावर नांदेडमधील गुरुद्वारात जीवघेणा हल्ला झाल्याची घटना समोर आली आहे. या प्रकरणातील आरोपीचे नाव जसपाल सिंह, वय 62, असे असल्याचे समोर आले आहे. विशेष म्हणजे जसपाल सिंह यांचे पुण्याशी जवळचे संबंध असल्याचे तपासात समोर आले आहे.
पोलिसांच्या चौकशीत जसपाल सिंह हे मूळचे पुण्यातील रहिवासी असल्याची माहिती पुढे आली आहे. त्यांनी पुण्यातच वकिलीचे शिक्षण घेतले होते. शिक्षणानंतर त्यांनी काही काळ स्नॅक्सचे दुकान चालवले. तसेच एका छोट्या वर्तमानपत्राचे कामही केल्याचे सांगितले जात आहे. जसपाल सिंहने जास्त काळ पुण्यातच घालवल्याचे समोर आले आहे.
जसपाल सिंह हे सुमारे 2 वर्षांपूर्वी धार्मिक सेवेसाठी नांदेडमध्ये स्थलांतरित झाले होते. त्यानंतर ते नांदेडमध्येच राहत असल्याची माहिती पोलिसांच्या तपासातून समोर आली आहे.
दरम्यान, जसपाल सिंह यांच्या कुटुंबाची माहितीही तपास यंत्रणांकडून घेतली जात आहे. त्यांची पत्नी पुणे कॅम्प परिसरातील एका शाळेत शिक्षिका असल्याचे समोर आले आहे. ती सध्या भच्यासोबत राहत असल्याची माहिती आहे. जसपाल सिंह यांचा मुलगा विवाहित असून तो पत्नीसोबत पुण्यातील लुल्लानगर भागात राहतो.
मिळालेल्या माहितीनुसार, गेल्या काही काळापासून जसपाल सिंह यांचा कुटुंबीयांशी संपर्क कमी झाला होता. कुटुंबातील सदस्यांशी त्यांचे नियमित बोलणेही होत नसल्याचे सांगण्यात येत आहे.
या प्रकरणाचा तपास अधिक वेगाने सुरू असून, एटीएसच्या पथकाने पुण्यातील जसपाल सिंह यांच्या घराचीही तपासणी केली. या झडतीदरम्यान संशयास्पद वस्तू किंवा आक्षेपार्ह बाब आढळून आली नसल्याची माहिती समोर आली आहे.
