लोणी काळभोर, (पुणे) : वाढत्या वयात ज्येष्ठ नागरिकांना प्रवासासाठी एसटी महामंडळाच्या सवलतींचा लाभ मिळावा, या उद्देशाने ज्येष्ठ नागरिक संघ लोणी काळभोरच्या वतीने एन.सी.एम.सी. स्मार्ट कार्ड शिबिराचे आयोजन करण्यात आले होते.
गुरुवारी (ता. 25) सकाळी 10 ते सायंकाळी 5 या वेळेत एकदिवसीय शिबिराचे आयोजन करण्यात आले होते. यामध्ये लोणी काळभोर, कुंजीरवाडी, थेऊर व कोलवडी येथील तब्बल 227 ज्येष्ठ नागरिकांनी आपले एसटी प्रवास सवलत कार्ड (स्मार्ट कार्ड) नोंदणी करून काढून घेतले. तर या शिबिरात महिलांची उपस्थिती लक्षणीय होती. अशी माहिती पूर्व हवेली ज्येष्ठ नागरिक संघाचे अध्यक्ष सुभाष आप्पा काळभोर यांनी दिली.
एसटी महामंडळाच्या आगारांमध्ये फेऱ्या मारण्याचा त्रास वाचवून थेट ज्येष्ठांच्या कार्यालयात जाऊन कार्ड बनवून देण्याच्या या उपक्रमाचे सर्वत्र कौतुक होत आहे. महाराष्ट्र ज्येष्ठ नागरिक महासंघ (फेस्कॉम)चे अध्यक्ष डॉ.अण्णासाहेब टेकाळे यांनी महाराष्ट्रातील ज्येष्ठ नागरिकांना एन.सी.एम.सी कार्ड अधिक सुलभ, सुखकर आणि सुरक्षित मिळावे अशी लेखी मागणी महाराष्ट्र राज्याचे परिवहन मंत्री प्रतापराव सरनाईक यांचेकडे केली होती.
दरम्यान, या मागणीची दखल घेऊन एस.टी महामंडळाने संबंधित एजंट हे ज्येष्ठ नागरिक संघाच्या कार्यालयात जाऊन एन.सी.एम.सी कार्ड काढून देतील असे लेखी पत्र फेस्कॉमला दिले. त्यानुसार या शिबिराचे आयोजन करण्यात आले होते. या शिबिरासाठी फेस्कॉम पुणे प्रादेशिक विभागाचे सचिव एकनाथ वाळुंज तसेच एन.सी.एम.सी कार्डचे पुणे-सातारा विभागाचे एस.ओ. श्रीकांत चित्ते यांचे विशेष सहकार्य लाभले. तसेच ज्येष्ठ नागरिक संघ सतत ज्येष्ठ नागरिकांसाठी विविध उपक्रम वेळोवेळी राबवत आहे.
याबाबत बोलताना फेस्कॉम पुणे प्रादेशिक विभागचे सचिव एकनाथ वाळुंज म्हणाले, “शिबीर यशस्वी करण्यासाठी सुभाष आप्पा काळभोर, पूर्व हवेली समन्वय समितीचे अध्यक्ष बाळासाहेब गायकवाड, तसेच ज्येष्ठ नागरिक संघ लोणी काळभोर सर्व संचालक मंडळ व कार्यकर्त्यांनी सकाळी 10 ते संध्याकाळी 5 या वेळेत परिश्रम घेऊन हे शिबिर यशस्वी केले.
