पुणे: पुणे जिल्ह्यातील आंबेगाव तालुक्यातील शिंगवे गावात एका चार वर्षांच्या चिमुकलीचा विनयभंग केल्याची अत्यंत संतापजनक घटना घडली आहे. एका सलून व्यावसायिकाने आपल्या दुकानात आलेल्या या चिमुकलीसोबत गैरवर्तन केल्याचा हा प्रकार समोर येताच परिसरात तीव्र संतापाची लाट उसळली आहे.
पीडित चार वर्षांची मुलगी आपल्या नातेवाईकांसोबत केस कापण्यासाठी स्थानिक सलूनमध्ये गेली होती. याच वेळी मोहम्मद फरदीन शहा या परप्रांतीय सलून व्यावसायिकाने तिला एकटी गाठून तिच्यासोबत अश्लील व गैरवर्तन केले. या घटनेमुळे मुलीच्या कुटुंबीयांना मोठा धक्का बसला आणि त्यांनी तात्काळ पोलिसांत तक्रार दाखल केली.
पारगाव पोलिसांनी प्रकरणाचे गांभीर्य ओळखून त्वरित गुन्हा दाखल केला आणि आरोपी मोहम्मद फरदीन शहा याला अटक केली. न्यायालयात हजर केल्यानंतर न्यायालयाने आरोपीला १३ जुलैपर्यंत पोलीस कोठडी सुनावली आहे. पोलीस आता या प्रकरणाचा सखोल तपास करत आहेत.
या घटनेचा आंबेगाव तालुका भारतीय जनता पक्ष आणि नाभिक समाज सलून असोसिएशनने तीव्र शब्दांत निषेध केला आहे. आरोपीला कठोरात कठोर शिक्षा व्हावी, अशी मागणी करण्यात येत आहे. तसेच, परिसरात व्यवसाय करणाऱ्या सर्व परप्रांतीय कामगारांची व सलून व्यावसायिकांची पोलिसांनी सखोल चौकशी आणि चारित्र्य पडताळणी करावी, अशी मागणी स्थानिक संघटनांनी केली आहे.
या घटनेमुळे संपूर्ण आंबेगाव तालुक्यात नागरिक आक्रमक झाले असून, भविष्यात अशा घटना घडू नयेत म्हणून कडक सुरक्षेची अपेक्षा व्यक्त केली जात आहे. पोलिसांनी नागरिकांना कायदा व सुव्यवस्था राखून सहकार्य करण्याचे आवाहन केले आहे.
