दिल्ली : मुख्य निवडणूक आयुक्त ज्ञानेश कुमार यांच्या राजीनाम्याची मागणी करत ‘कॉकरोच जनता पार्टी’ने (सीजेपी)आक्रमक आंदोलन सुरू केले आहे. हे आंदोलन दिल्लीतील प्रसिद्ध जंतर-मंतर मैदानावर आयोजित करण्यात आले होते. मात्र, आंदोलनासाठी आलेल्या सीजेपीचे संस्थापक अभिजीत दीपके, आशुतोष रांका आणि सौरभ दास यांना दिल्ली विमानतळावरच पोलिसांनी ताब्यात घेतले.या कारवाईनंतर आता प्रसिद्ध पर्यावरणवादी व शिक्षणतज्ज्ञ सोनम वांगचुक यांनी या घटनेवर तीव्र नाराजी व्यक्त केली आहे.
“सध्या देश अघोषित आणीबाणीच्या संकटातून जात आहे,” असा थेट आरोप वागचुक यांनी केला आहे . पोलिसांच्या या अटकेच्या कारवाईचा निषेध करत त्यांनी सर्व नेत्यांची तात्काळ सुटका करण्याची मागणी केली आहे. जर उद्यापर्यंत या नेत्यांना सोडले नाही, तर पुन्हा एकदा मोठे उपोषण किंवा पदयात्रा काढू, असा कडक इशारा वांगचुक यांनी प्रशासनाला दिला आहे.
यापूर्वीही धर्मेंद्र प्रधान यांच्या राजीनाम्यासाठी सीजेपी आणि सोनम वांगचुक यांनी एकत्र येत मोठे आंदोलन उभारले होते. त्यावेळी वांगचुक यांच्या उपोषणामुळेच सरकारवर मोठा दबाव निर्माण झाला होता. आता पुन्हा एकदा ज्ञानेश कुमार यांच्याविरोधातील आंदोलनाला वांगचुक यांनी पाठिंबा दिल्याने आणि उपोषणाचा इशारा दिल्याने सत्ताधारी आणि पोलीस यंत्रणेची चिंता वाढली आहे.
या आंदोलनात अनेक विरोधी नेत्यांनाही सहभागी होण्याआधीच रोखून ताब्यात घेण्यात आले.मुख्य नेत्यांना अटक झाल्यानंतर आता या आंदोलनाची धुरा सीजेपीचे नेते अजिंक्य शिंदे यांनी सांभाळली आहे. कोणत्याही परिस्थितीत आंदोलन मागे घेतले जाणार नाही, असा ठाम निर्धार शिंदे यांनी व्यक्त केला आहे.
