पुणे: पुण्यातील सिंहगड रोड परिसरातून एक धक्कादायक घटना समोर आली आहे. अनैतिक संबंधांबाबत पत्नीने जाब विचारल्याच्या रागातून एका पतीने स्वतःचेच घर पेटवून दिल्याची संतापजनक घटना घडली आहे. या आगीत घरातील संसारोपयोगी साहित्य जळून खाक झाले असून, घरात अडकलेल्या तीन पाळीव मांजरींचा होरपळून मृत्यू झाला. या प्रकरणी पर्वती पोलिसांनी आरोपी पतीविरुद्ध गुन्हा दाखल केला आहे.
दयानंद आनंता कसबे (वय ३८, रा. सावित्रीबाई फुले वसाहत, सिंहगड रोड) असे गुन्हा दाखल झालेल्या आरोपीचे नाव आहे. याप्रकरणी त्यांच्या पत्नीने पर्वती पोलीस ठाण्यात तक्रार दिली आहे. ही घटना ९ जुलै २०२६ रोजी रात्री साडेनऊच्या सुमारास घडली.
पोलिसांनी दिलेल्या माहितीनुसार, आरोपी दयानंद कसबे याचे एका महिलेशी अनैतिक संबंध असल्याचा संशय होता. काही दिवसांपूर्वी त्यांच्या मुलाने वडिलांना संबंधित महिलेसोबत पाहिले आणि ही बाब आईला सांगितली. त्यानंतर पत्नीने पतीला याबाबत जाब विचारला. एवढ्यावर न थांबता ती संबंधित महिलेच्या कोथरूड येथील घरी जाऊन तिलाही जाब विचारून सुनावणी केली.
या घटनेची माहिती संबंधित महिलेने फोन करून दयानंद कसबे याला दिली. त्यानंतर संतापलेल्या दयानंदने रागाच्या भरात स्वतःच्या राहत्या घराला आग लावल्याचा आरोप आहे.
आगीत घरातील संसारोपयोगी साहित्य पूर्णपणे जळून खाक झाले. आग लागली तेव्हा घरात तीन पाळीव मांजरी अडकल्या होत्या. त्यांना बाहेर पडण्याची संधी न मिळाल्याने त्या होरपळून मृत्युमुखी पडल्या. घटनेची माहिती मिळताच अग्निशमन दलाने घटनास्थळी धाव घेत आग आटोक्यात आणली.
घटनेनंतर वरिष्ठ पोलीस निरीक्षक राजेंद्र महाले आणि सहायक पोलीस निरीक्षक सुभाष महाले यांनी घटनास्थळी भेट देऊन पाहणी केली. या प्रकरणाचा पुढील तपास सहायक पोलीस निरीक्षक सुभाष महाले करत आहेत.
