पुणे: पुण्यातील चंदननगर परिसरातून सायबर फसवणुकीची एक धक्कादायक घटना समोर आली आहे. उच्चशिक्षित आणि चांगल्या पगारावर काम करणाऱ्या एका २५ वर्षीय आयटी इंजिनिअर तरुणीला लग्नाचे आमिष दाखवून सायबर भामट्याने तब्बल 435000 रुपयांचा चुना लावला आहे. या प्रकरणी पीडित तरुणीने पोलिसात तक्रार दाखल केल्यानंतर गुन्हा नोंदवण्यात आला आहे.
मिळालेल्या माहितीनुसार, ही तरुणी वडगाव शेरी परिसरातील सोमनाथनगर येथील एका खाजगी हॉस्टेलमध्ये राहून मोठ्या आयटी कंपनीत नोकरी करते. योग्य जोडीदार शोधण्यासाठी तिने एका मॅट्रिमोनिअल वेबसाईटवर आपले प्रोफाईल तयार केले होते. फेब्रुवारी 2026 मध्ये एका सायबर चोराने तिच्याशी संपर्क साधला. आपण रशियातील मॉस्को शहरात मोठ्या हुद्द्यावर नोकरी करत असल्याची खोटी माहिती त्याने दिली आणि तरुणीचा विश्वास जिंकला.
काही दिवस गोड बोलून आणि लग्नाचे स्वप्न दाखवून त्या भामट्याने तरुणीला आपल्या जाळ्यात ओढले. त्यानंतर एक दिवस अचानक फोन करून त्याने आपली प्रकृती बिघडल्याचे नाटक केले. छातीत तीव्र वेदना होत असून उपचारासाठी तातडीने पैशांची गरज असल्याचे सांगत त्याने तरुणीकडे भावनिक साद घातली. आपला भावी जोडीदार परदेशात संकटात सापडला आहे, या विचाराने घाबरलेल्या त्या तरुणीने कोणतीही शहानिशा न करता तात्काळ ऑनलाइन माध्यमातून 435000 रुपये आरोपीने सांगितलेल्या खात्यात पाठवून दिले.
पैसे मिळाल्यानंतर त्या भामट्याने तिचा फोन नंबर बंद केला आणि सर्व संपर्क तोडला. आपली फसवणूक झाल्याचे लक्षात येताच तरुणीच्या पायाखालची जमीन सरकली. तिने तात्काळ चंदननगर पोलीस ठाण्यात जाऊन सर्व प्रकार सांगितला. सध्या पोलीस या प्रकरणी तांत्रिक पुराव्यांच्या आधारे त्या भामट्याचा कसून शोध घेत आहेत.
