अहिल्यानगर: अन्न व औषध प्रशासनाने (एफडीए) अहिल्यानगर जिल्ह्यात मोठी कारवाई करत विक्रीसाठी ठेवण्यात आलेली बंदी असलेली पाकिस्तानी सौंदर्यप्रसाधने जप्त केली आहेत. संगमनेर शहरातील गोल्डन मार्केट परिसरातील एका दुकानावर टाकलेल्या छाप्यात ही कारवाई करण्यात आली. या घटनेमुळे परिसरात खळबळ उडाली असून पुढील तपास सुरू आहे.
मिळालेल्या माहितीनुसार, एफडीएने संगमनेर शहर पोलिसांच्या मदतीने शनिवारी दुपारी संबंधित दुकानावर छापा टाकला. या कारवाईदरम्यान पाकिस्तानमध्ये तयार करण्यात आलेली ‘गोरी ब्युटी क्रीम’ आणि ‘गोरी डे अँड नाईट क्रीम’ विक्रीसाठी ठेवण्यात आल्याचे आढळून आले. या छाप्यात सुमारे 12 हजार 900 रुपयांचा सौंदर्यप्रसाधनांचा साठा जप्त करण्यात आला.
औषध निरीक्षक सोमनाथ मुळे यांच्या फिर्यादीवरून ही कारवाई करण्यात आली. तपासादरम्यान जप्त करण्यात आलेल्या उत्पादनांवर “Made in Pakistan” आणि “Pakistan Standard” असा उल्लेख असल्याचे निदर्शनास आले. तसेच भारतात विक्रीसाठी आवश्यक परवानगी नसतानाही ही उत्पादने विक्रीसाठी ठेवण्यात आल्याचे प्राथमिक तपासात समोर आले आहे.
या प्रकरणी दुकानदार शाहीद रियाज शेख याला चौकशीसाठी ताब्यात घेण्यात आले असून त्याच्याविरुद्ध संगमनेर शहर पोलीस ठाण्यात संबंधित कायद्यांनुसार गुन्हा दाखल करण्यात आला आहे. ही उत्पादने नेमकी कुठून आणण्यात आली, त्यांचा पुरवठा कोणी केला आणि अशा प्रकारची उत्पादने अन्य ठिकाणीही विकली जात आहेत का, याचा तपास एफडीए आणि पोलिसांकडून सुरू आहे.
एफडीएने नागरिकांना, विशेषतः महिलांना, सौंदर्यप्रसाधने खरेदी करताना उत्पादनावरील उत्पादक कंपनी, उत्पादनाचा देश, परवाना आणि लेबलवरील माहिती तपासूनच खरेदी करण्याचे आवाहन केले आहे. तसेच संशयास्पद किंवा अनधिकृत उत्पादने आढळल्यास तत्काळ संबंधित प्रशासनाला माहिती देण्याचेही आवाहन करण्यात आले आहे.
