पुणे: बावधन परिसरातील तोडकर वस्ती येथे कौटुंबिक वादातून महिलेची हत्या झाल्याची धक्कादायक घटना समोर आली आहे. पती-पत्नीमध्ये झालेल्या वादानंतर पतीने पत्नीवर धारदार शस्त्राने हल्ला केल्याची माहिती आहे. या घटनेनंतर आरोपी पती घटनास्थळावरून फरार झाला असून, पोलिसांकडून त्याचा शोध सुरू आहे.
मृत महिलेचे नाव नीलाबाई परशुराम हरिजन (वय 45) असे आहे. त्या भूगाव रोडवरील तोडकर वस्ती येथे राहत होत्या. मिळालेल्या माहितीनुसार, नीलाबाई आणि त्यांचे पती परशुराम भागप्पा हरिजन यांच्यात घरगुती कारणावरून वाद झाला होता. सुरुवातीला झालेला वाद पुढे वाढत गेला आणि परिस्थिती गंभीर बनली.
वाद वाढल्यानंतर परशुराम याने धारदार हत्याराने नीलाबाई यांच्या गळ्यावर वार केल्याचे पोलिसांच्या प्राथमिक माहितीतून समोर आले आहे. गंभीर दुखापत झाल्याने मोठ्या प्रमाणात रक्तस्राव झाला आणि नीलाबाई यांचा मृत्यू झाला.
घटनेची माहिती मिळताच परिसरात एकच खळबळ उडाली. नीलाबाई यांच्या मुलाने, सुरेश हरिजन याने पोलिसांकडे धाव घेत घटनेची माहिती दिली. आईच्या हत्येमुळे कुटुंबीयांना मोठा धक्का बसला आहे.
माहिती मिळाल्यानंतर बावधन पोलीस ठाण्याचे पथक घटनास्थळी दाखल झाले. पोलिसांनी घटनास्थळाची पाहणी करून पंचनामा केला. सुरेश हरिजन यांच्या फिर्यादीवरून परशुराम हरिजन याच्याविरुद्ध खुनाचा गुन्हा दाखल करण्यात आला आहे. दरम्यान, घटनेनंतर आरोपी फरार झाला असून त्याचा शोध घेण्यासाठी पोलिसांनी तपास सुरू केला आहे.
