लोणी काळभोर, (पुणे) : लोणी काळभोरसह परिसरात आज रविवारी (ता. 24) दूपारपासून नामांकित समजल्या जाणाऱ्या ‘एअरटेल’ मोबाईल कंपनीची नेटवर्क सेवा पूर्णपणे विस्कळीत झाली आहे. मोबाईलला रेंजच येत नसल्याने फोन कॉल्स आणि इंटरनेट सेवा पूर्णपणे ठप्प झाली आहे. ऐन कामाच्या वेळीच नेटवर्क गायब झाल्याने नोकरदार, व्यावसायिक आणि सामान्य नागरिक प्रचंड हैराण झाले असून, कंपनीच्या या सुमार दर्जाच्या सेवेबद्दल ग्राहकांमधून तीव्र संताप व्यक्त केला जात आहे.
मोबाईल नेटवर्कमुळे कॉल ड्रॉप होणे, आवाज ऐकायला न येणे, फोन ज्याला लावला आहे तो सोडून दुसरीकडेच लागणे या समस्यांचा सामना नागरिकांना करावा लागत आहे. पूर्व हवेलीतील ऐअरटेल या कंपनीची सेवा विस्कळीत झाली आहे. त्यामुळे एअरटेलच्या नेटवर्कवर अवलंबून असलेली सर्व सुविधांचा बट्ट्याबोळ उडाला आहे.
डिजिटल युगात, स्मार्टफोन हे आपल्या जीवनाचा अविभाज्य भाग बनले आहे. अनेक कामे स्मार्टफोनच्या मदतीने करता येतात. मात्र फोनमध्ये चांगला सिग्नल असूनही इंटरनेट योग्यरित्या काम करत नाही.आजच्या डिजिटल युगात बँक खात्यापासून ते अगदी किराणा दुकानातील पेमेंटपर्यंत सर्व गोष्टी इंटरनेटवर अवलंबून आहेत. एअरटेलचे इंटरनेट पूर्णपणे बंद पडल्याने गुगल पे, फोन पे यांसारख्या युपीआय सेवा ठप्प झाल्या आहेत.
दरम्यान, बाजारात खरेदीसाठी गेलेल्या नागरिकांना ऑनलाइन पेमेंट करता येत नसल्याने व्यापारी व नागरीकांचे व्यवहार होत नसल्याने नाराजी व्यक्त केली जात आहे. एअरटेल कंपनीने मोठ्या प्रमाणावर ग्राहक आकर्षित केले असले तरी वारंवार खंडित होणाऱ्या सेवेने आता ग्राहकांचा संयम सुटू लागला आहे.
