अहिल्यानगर: अहिल्यानगरमधून (Ahilyanagar News) धक्कादायक प्रकार समोर आला आहे. अहिल्यानगर (Ahilyanagar Crime) पोलीस दलाच्या स्थानिक गुन्हे शाखेत (Pune Crime) कार्यरत असलेला पोलीस हवालदार शामसुंदर विश्वनाथ गुजर हा खाकी वर्दीत ड्रग्ज विक्री करत असल्याचे उघड झाले आहे. पहाटे 4 वाजता पुणे ग्रामीण पोलिसांनी त्याला अटक केली असून, या घटनेने संपूर्ण पोलीस यंत्रणेत खळबळ उडाली आहे. या प्रकरणाची माहिती पोलीस अधीक्षक संदीपसिंग गिल यांनी पत्रकार परिषदेत दिली. (Latest Marathi News)
या प्रकरणाची सुरुवात 17 जानेवारी रोजी झाली. पुणे जिल्ह्यातील शिरूर तालुक्यात शादाब शेख या गॅरेज चालकाला दुचाकीवरून अंमली पदार्थ विक्रीसाठी येत असल्याची माहिती पोलिसांना मिळाली होती. सापळा रचून त्याला 1 किलो अंमली पदार्थांसह रंगेहाथ पकडण्यात आले. चौकशीत शादाबने हे अंमली पदार्थ अहिल्यानगर जिल्ह्यातील पारनेर तालुक्यातील ज्ञानदेव उर्फ माऊली शिंदे, ऋषिकेश चित्तर आणि महेश गायकवाड यांच्याकडून घेतल्याचे सांगितले.
यानंतर पुणे पोलिसांनी या तिघांना अटक केली असता त्यांच्याकडे आणखी 9 किलो 655 ग्रॅम अंमली पदार्थ सापडले. एवढ्या मोठ्या प्रमाणात अंमली पदार्थ कुठून येत आहेत, याचा तपास सुरू असताना धक्कादायक सत्य समोर आले. हे अंमली पदार्थ थेट अहिल्यानगर पोलीस दलातील पोलीस हवालदार शामसुंदर गुजर याने पुरवले असल्याचे तपासात निष्पन्न झाले.
शामसुंदर गुजर हा मुद्देमाल कक्षात ठेवण्यात आलेल्या, विविध गुन्ह्यांमध्ये जप्त केलेल्या अंमली पदार्थांमधून सील उघडून माल बाहेर काढत होता आणि त्याची विक्री करत होता, अशी माहिती पोलिस तपासात समोर आली आहे. आतापर्यंत या प्रकरणात एकूण 10 किलो 707 ग्रॅम अंमली पदार्थ जप्त करण्यात आले आहेत.
या प्रकरणात अहिल्यानगर पोलीस दलातील आणखी कोणी अधिकारी किंवा कर्मचारी सहभागी आहेत का, याचाही तपास सुरू आहे. खाकी वर्दीतला पोलीसच ड्रग्ज माफिया निघाल्याने नागरिकांचा पोलिसांवरील विश्वास हादरला असून, या प्रकरणाचे दूरगामी परिणाम होण्याची शक्यता व्यक्त केली जात आहे.
