आदित्य बोराटे
इंदापूर: राष्ट्रीय हरित न्यायाधिकरणाच्या (एनजीटी) आदेशानुसार प्रतिबंधित असलेल्या आफ्रिकन मांगूर (कॅरियस गॅरिपिनियस) जातीच्या तब्बल सहा हजार किलो (सहा टन) माशांची वाहतूक करणाऱ्यांवर इंदापूर पोलिस व मत्स्यविभाग यांनी संयुक्त कारवाई केली. या कारवाईत १९ लाख २० हजार रुपयांचा मुद्देमाल जप्त करण्यात आला असून, जप्त केलेले प्रतिबंधित मांगूर मासे नष्ट करण्यात आले. या प्रकरणी दोघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, शनिवारी (दि. २५) रात्री सुमारे आठ वाजण्याच्या सुमारास शहा (ता. इंदापूर) येथील इजगुडे वस्ती परिसरातील तळ्याजवळ ही कारवाई करण्यात आली. सहायक मत्स्य व्यवसाय विकास अधिकारी राजेंद्र रूपचंद राठोड (मत्स्यबीज केंद्र, हडपसर, पुणे) यांनी सरकारतर्फे फिर्याद दिली आहे.
या प्रकरणात मनोजकुमार पिरमालु गुरुदास (मूळ रा. आंध्र प्रदेश, सध्या रा. शहा, ता. इंदापूर) आणि आयशर टेम्पो चालक रोहीदास रामचंद्र मंजुळकर (रा. बिजवडी, ता. इंदापूर) यांच्याविरुद्ध इंदापूर पोलिस ठाण्यात गुन्हा दाखल करण्यात आला आहे. आरोपी आयशर टेम्पो (क्र. MH 42 BU 9559) मधून प्रतिबंधित मांगूर माशांची वाहतूक करीत असल्याचे पोलिस तपासात निष्पन्न झाल्याचे फिर्यादीत नमूद आहे.
या कारवाईदरम्यान १५ लाख रुपये किमतीचा आयशर टेम्पो आणि सुमारे ४ लाख २० हजार रुपये किमतीचे सहा हजार किलो प्रतिबंधित मांगूर मासे असा एकूण १९ लाख २० हजार रुपयांचा मुद्देमाल जप्त करण्यात आला. त्यानंतर संबंधित विभागाच्या व पोलिसांच्या उपस्थितीत जप्त करण्यात आलेले प्रतिबंधित मांगूर मासे इंदापूर नगरपालिकेच्या कचरा डेपो येथे नष्ट करण्यात आल्याची माहिती पोलिसांनी दिली.
फिर्यादीनुसार, आफ्रिकन मांगूर ही जात राष्ट्रीय हरित न्यायाधिकरणाच्या आदेशानुसार प्रतिबंधित असून, तिची पैदास, संवर्धन आणि वाहतूक पर्यावरणासाठी धोकादायक मानली जाते. या प्रकरणी भारतीय न्याय संहिता (बीएनएस) कलम २२३ व ३(५), अन्न सुरक्षा व मानके अधिनियम कलम ५९ तसेच पर्यावरण संरक्षण अधिनियम, १९८६ मधील कलम ३, ५ आणि १५ अन्वये गुन्हा दाखल करण्यात आला आहे. या प्रकरणाचा पुढील तपास पोलीस हवालदार शिंदे करीत आहेत.
