हडपसर, ता. 17: पुणे-सोलापूर महामार्गावर भरधाव टँकरच्या धडकेत दुचाकीस्वाराचा जागीच मृत्यू झाल्याची धक्कादायक घटना घडली आहे. ही घटना हडपसर परिसरात गुरुवारी (ता. 16) दुपारी पावणे दोन वाजण्याच्या सुमारास घडली आहे. निष्काळजीपणे वाहन चालवत अपघात घडवून आणल्यानंतर चालकाने मदत न करता घटनास्थळावरून पलायन केल्याने संताप व्यक्त केला जात आहे. तर या प्रकरणी दोघांच्या विरोधात गुन्हा दाखल करण्यात आला आहे.
प्रतिक अश्विन शेठ (वय 43, रा. रास्तापेठ, पुणे) असे मृत्यू झालेल्याचे नाव आहे. तर उमेश आनंदराव जाधव व टँकर चालक अविनाश आनंदराव जाधव (वय 33 रा. शेवाळेवाडी ता. हवेली, जि. पुणे) अशी गुन्हा झालेल्या दोघांची नावे आहेत. पोलिसांनी दिलेल्या माहितीनुसार, प्रतिक शेठ हे त्यांच्य दुचाकीवरून पुण्याकडून उरुळी कांचनच्या दिशेने जात होते. रविदर्शन बस स्टॉपजवळ पोहोचताच, मागून आलेल्या अशोक लेलँड कंपनीच्या एमएच 12 एचडी 3276 क्रमांकाच्या पाण्याच्या टँकरने त्यांच्या दुचाकीला जोरदार धडक दिली.
या धडकेत प्रतिक शेठ रस्त्यावर पडले. मात्र, त्यानंतरही टँकर चालकाने वाहन थांबविण्याऐवजी अधिक वेगाने पुढे नेले. परिणामी, टँकरचे पुढील चाक थेट प्रतिक यांच्या डोक्यावरून गेल्याने त्यांचा जागीच मृत्यू झाला. हा प्रकार पाहून उपस्थित नागरिकांनी टँकर थांबवण्याचा प्रयत्न केला, मात्र चालक अविनाश जाधव हा लोकांची नजर चुकवून पळून गेला.
दरम्यान, या घटनेमुळे परिसरात मोठी खळबळ उडाली असून नागरिकांमध्ये संतापाची लाट उसळली आहे. विशेष म्हणजे, टँकरवर आवश्यक सुरक्षा सुविधा तसेच क्लिनर नसताना वाहन रस्त्यावर आणण्यात आले होते, अशी माहिती समोर आली आहे. यामुळे अपघातास जबाबदार टँकर मालक उमेश जाधव यांच्याविरोधातही गंभीर आरोप करण्यात आले आहेत.
या घटनेची माहिती मिळताच हडपसर पोलिसांनी तात्काळ घटनास्थळी धाव घेत तपास सुरू केला. फिर्यादी नितीन बंबोली यांच्या तक्रारीवरून टँकर चालक व मालकाविरोधात महाराष्ट्र मोटार वाहन नियम 1989 चे कलम 134, 184 तसेच भारतीय न्याय संहिता (BNS) 2023 चे कलम 3(5) व 105 अंतर्गत गुन्हा दाखल करण्यात आला आहे.
