पुणे: पुण्यातील चाकण परिसरातून एक अत्यंत धक्कादायक आणि मन सुन्न करणारी घटना समोर आली आहे. पतीच्या संशयी स्वभावामुळे एका 27 वर्षीय विवाहित महिलेला आपला जीव गमवावा लागला आहे. रफिक पठाण (वय 32) असे या आरोपी पतीचे नाव असून, त्याने आपली पत्नी बडीमा रफिक पठाण (वय 27) हिची अत्यंत निर्घृणपणे हत्या केली आहे. या घटनेने संपूर्ण चाकण परिसरात खळबळ उडाली असून नागरिक या घटनेमुळे हादरले आहेत.
मिळालेल्या माहितीनुसार, आरोपी रफिक पठाण हा व्यवसायाने गवंडी काम करत होता. गेल्या काही दिवसांपासून त्याच्या मनात पत्नीच्या चारित्र्याबद्दल संशय निर्माण झाला होता. याच संशयावरून त्यांच्यात दररोज वाद होत होते आणि भांडणे वाढत होती. शुक्रवारी पुन्हा एकदा याच कारणावरून पती-पत्नीमध्ये जोरदार भांडण झाले. या वादाचे रूपांतर इतक्या भीषण हिंसेत होईल, याची कोणालाही कल्पना नव्हती. रागाच्या भरात रफिकने घरातील मिक्सरची वायर घेतली आणि तिचा गळा आवळून हत्या केली.
या प्रकरणातील सर्वात धक्कादायक बाब म्हणजे, पत्नीचा खून केल्यानंतर आरोपी रफिक शांतपणे चाकण पोलीस ठाण्यात गेला आणि आपण पत्नीची हत्या केल्याची कबुली दिली. महिलेचे वडील मकबूल नदाफ (वय 55) यांनी दिलेल्या फिर्यादीवरून पोलिसांनी आरोपी रफिक पठाणला तात्काळ अटक केली आहे. वरिष्ठ पोलीस निरीक्षक जितेंद्र कदम यांच्या मार्गदर्शनाखाली पोलीस या प्रकरणाचा सखोल तपास करत आहेत.
