Pune Crime : शहरातील नाना पेठ भागात आयुष कोमकर (Ayush komkar murder case) याच्यावर गोळीबार केल्याप्रकरणी दोन आरोपींना आता 22 सप्टेंबरपर्यंत पोलीस कोठडी सुनावण्यात आली आहे. कोर्टाने हा महत्त्वपूर्ण निर्णय दिल्याने पोलीस तपासाला आणखी गती मिळणार आहे.
आयुष कोमकर याच्यावर झालेल्या या हल्ल्याने संपूर्ण पुणे शहर हादरले आहे. हे प्रकरण टोळीयुद्धाशी संबंधित असल्याचे समोर आल्यानंतर पोलिसांनी या प्रकरणातील काही मुख्य आरोपींना अटक केले असून, आता त्यांना पोलीस कोठडी मिळाली आहे.
या प्रकरणी पोलिसांनी आंदेकर टोळीचा म्होरक्या बंडू आंदेकर याच्यासह एकूण आठ जणांना अटक केली आहे. तर या हत्याकांडातील मास्टरमाइंड कृष्णा आंदेकर आणि इतर चार जण फरार आहेत. आरोपींपाचा पोलिसांकडून शोध सुरू आहे. दरम्यान, हत्येच्या पहिल्याच दिवशी पोलिसांनी प्रत्यक्ष हत्येत सहभागी असलेल्या यश पाटील आणि अमित पठाण यांना अटक केली होती. तेव्हापासून दोन्ही आरोपी पोलीस कोठडीत आहेत. दोघांच्या अटकेनंतर कोर्टाने त्यांना १२ सप्टेंबरपर्यंत पोलीस कोठडी सुनावली होती. शुक्रवारी त्यांची पोलीस कोठडी संपल्यानंतर त्यांना पुन्हा मकोका न्यायालयात हजर करण्यात आलं. यानंतर कोर्टाने पुन्हा एकदा आरोपींच्या पोलीस कोठडीत वाढ करून ती २२ सप्टेंबरपर्यंत केली आहे.
पोलिसांनी कोर्टाकडे या प्रकरणात दोघांकडे पिस्तूल कुठून आली? ते दोघं कुणाच्या संपर्कात होते? हल्ला करण्यासाठी त्यांना कुणी सांगितलं? हल्ल्यामागचा मुख्य हेतू काय होता? याचा तपास करण्यासाठी पोलीस कोठडी वाढवून देण्याची विनंती केली होती. त्यानंतर न्यायालयाने हा निर्णय दिला आहे.
