Yavat Crime : यवत, ता. 11 : मागील काही दिवसांपूर्वी आपल्या भावावर आणि पत्नीवर झालेल्या पोलीस कारवाईचा राग मनात धरून सराईत गुंडाने आपल्या साथीदारांसह फॉर्च्युनर गाडीच्या काचा फोडून कुटुंबाला जीवे मारण्याची धमकी दिल्याची घटना घडली आहे. बुधवारी (ता. 08) रात्री पाऊणे बारा वाजण्याच्या सुमारास यवत हद्दीतील मलभारे वस्ती येथे ही घटना घडली. याप्रकरणी तिघांवर यवत पोलीस ठाण्यात गुन्हा दाखल करण्यात आला आहे.
याप्रकरणी सदाशिव जानकुराम मलभारे (वय-53, रा. मलभारे वस्ती, यवत, ता. दौंड) यांनी यवत पोलीस ठाण्यात फिर्याद दिली आहे. त्यानुसार पोलिसांनी शुभम बाळू लकडे (रा. मानकोबावाडा, यवत, ता. दौंड) आणि अनोळखी दोघांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी सदाशिव मलभारे यांचा मुलगा विक्रम मलभारे हा कुटुंबासह लोणी काळभोर येथील नातेवाईकांकडे जेवणासाठी गेला होता. बुधवारी (ता. 08) रात्री 10 वाजता सर्वजण घरी परतले आणि त्यांनी त्यांची फॉर्च्युनर गाडी (क्र. MH 14 EA 7575) घरासमोर उभी केली होती.
रात्री पाऊणे बारा वाजण्याच्या सुमारास घराबाहेर आरडाओरडा ऐकू आल्याने मलभारे पिता-पुत्र बाहेर आले. तेव्हा तिथे शुभम लकडे हा आपल्या दोन साथीदारांसह उभा होता. शुभम आणि त्याच्या एका साथीदाराच्या हातात लोखंडी कोयते होते. त्यांनी आरडाओरडा करत मलभारे यांच्या फॉर्च्युनर गाडीच्या काचा फोडण्यास सुरुवात केली. जेव्हा सदाशिव मलभारे आणि त्यांचा मुलगा मदतीसाठी ओरडले, तेव्हा शुभम लकडे हा कोयता घेऊन त्यांच्या अंगावर धावून आला. जीवाच्या भीतीने मलभारे कुटुंबीयांनी घरात पळून जाऊन दरवाजा बंद करून घेतला.
यावेळी आरोपी शुभम लकडे याने घराच्या ओट्यावर कोयता जोरजोरात मारून परिसरात दहशत निर्माण केली. “माझ्या भावावर आणि पत्नीवर गुन्हा दाखल केल्याचा बदला घेईन, आमच्या नादी लागला तर जीवे ठार मारून टाकीन,” अशी धमकी त्याने भरवस्तीत दिली. त्यानंतर तो आपल्या साथीदारांसह दुचाकीवरून पसार झाला.
घटनेनंतर मलभारे यांनी तातडीने ‘डायल 112’ वर फोन करून पोलिसांना पाचारण केले. पोलिसांनी घटनास्थळी येऊन पंचनामा केला आहे. सुरुवातीला दहशतीमुळे हे कुटुंब तक्रार देण्यास पुढे आले नव्हते, मात्र धाडस करून त्यांनी 10 एप्रिल रोजी यवत पोलीस ठाण्यात धाव घेतली. सदाशिव मलभारे यांनी दिलेल्या फिर्यादीवरून शुभम बाळू लकडे आणि त्याच्या इतर साथीदारांवर गुन्हा दाखल करण्यात आला आहे. पुढील तपास पोलीस उपनिरीक्षक मेतलवाड करीत आहेत.
