पुणे : अंधश्रद्धेच्या नावाखाली २९ वर्षीय विवाहित महिलेचा छळ केल्याचा धक्कादायक प्रकार चंदननगर परिसरात समोर आला आहे. पतीला मंगळदोष असल्याचे सांगून तो दूर करण्याच्या नावाखाली महिलेला कथित अघोरी कृत्ये करण्यास भाग पाडल्याचा आरोप आहे. यामध्ये पतीच्या खासगी अवयवाला हळदी-कुंकू लावून त्याची पूजा करण्यास महिलेला भाग पाडल्याचे तक्रारीत नमूद करण्यात आले आहे. या प्रकरणी चंदननगर पोलिसांनी पतीसह सासरच्या पाच जणांविरोधात गुन्हा दाखल केला आहे.
पोलिसांकडे दाखल तक्रारीनुसार, विवाह ठरण्यापूर्वीच सासरच्या मंडळींनी महिलेच्या कुटुंबीयांकडे १५ लाख रुपयांच्या हुंड्याची मागणी केली होती. मुलीचा विवाह होण्यासाठी तिच्या वडिलांनी २ लाख २० हजार रुपये ऑनलाइन पद्धतीने दिले. मात्र, विवाहानंतर उर्वरित हुंड्याची रक्कम न दिल्याच्या कारणावरून महिलेचा कथित छळ सुरू झाला.
दरम्यान, महिलेच्या पतीला मंगळदोष असल्याचे सांगण्यात आले. हा दोष दूर करण्यासाठी भोंदूबाबाच्या सांगण्यावरून महिलेला विविध अघोरी प्रकार करण्यास भाग पाडल्याचा आरोप तिने केला आहे. कथित अघोरी विधीचा एक भाग म्हणून अंगारा पाण्यात मिसळून पिण्यास भाग पाडण्यात आले. त्यानंतर पतीच्या खासगी अवयवाला हळदी-कुंकू लावून त्याची पूजा करण्यासही महिलेला भाग पाडल्याचे तक्रारीत म्हटले आहे.
गेल्या चार महिन्यांपासून शारीरिक आणि मानसिक छळ सुरू असल्याचा आरोप महिलेने केला आहे. पतीचा मंगळदोष दूर झाला असल्याचे सांगून सासरच्या मंडळींनी तिला नांदवण्यास नकार दिल्याचेही तक्रारीत नमूद आहे. तसेच मंगळदोष दूर करण्याच्या कारणाखालीच आपल्याशी विवाह करण्यात आल्याचा आरोपही महिलेने केला आहे.
सासरच्या छळाला कंटाळल्यानंतर महिलेने चंदननगर पोलीस ठाण्यात धाव घेत तक्रार दाखल केली. त्यानुसार पतीसह सासरच्या पाच जणांविरोधात गुन्हा दाखल करण्यात आला असून, पोलिसांकडून या प्रकरणाचा पुढील तपास सुरू आहे. हुंड्याची मागणी, कथित अघोरी कृत्ये आणि अंधश्रद्धेच्या नावाखाली झालेल्या छळाच्या सर्व आरोपांची पोलीस चौकशी करत आहेत.
