डॉ. अशोक बालगुडे
पुणे : महाराष्ट्राच्या राजकारणात शिवसेनेतील फूट कायम असतानाच उद्धव ठाकरे आणि एकनाथ शिंदे भविष्यात एकत्र येऊ शकतात, अशा आशयाच्या रवींद्र धंगेकर यांच्या विधानाने नव्या राजकीय चर्चेला तोंड फुटले आहे. ठाकरे आणि शिंदे यांच्यातील दुरावा संपुष्टात येण्याची शक्यता त्यांनी व्यक्त केल्याने राजकीय वर्तुळात या विधानाचे वेगवेगळे अर्थ लावले जात आहेत. मात्र, दोन्ही नेत्यांकडून याबाबत अधिकृत भूमिका स्पष्ट झालेली नाही.
शिवसेनेतील फुटीनंतर राज्याच्या राजकारणात दोन स्वतंत्र राजकीय प्रवाह निर्माण झाले. एकनाथ शिंदे यांनी भाजपसोबत सत्ता स्थापन केली, तर उद्धव ठाकरे यांनी महाविकास आघाडीच्या माध्यमातून विरोधी राजकारण सुरू ठेवले. या फुटीचा परिणाम केवळ पक्षसंघटनेवरच नव्हे, तर राज्यातील राजकीय समीकरणांवरही झाला.
अशा पार्श्वभूमीवर धंगेकर यांच्या विधानामुळे भविष्यातील राजकीय शक्यतांबाबत चर्चा सुरू झाली आहे. मात्र, राजकीय विधान आणि प्रत्यक्ष युतीची प्रक्रिया यांत मोठे अंतर असते. दोन्ही गटांतील नेतृत्व, कार्यकर्त्यांची भूमिका, सत्तेची समीकरणे आणि परस्पर राजकीय विश्वास या बाबी निर्णायक ठरतील.
