पुणे: संत ज्ञानेश्वर महाराज आणि संत तुकाराम महाराज यांच्या पालख्यांचे ९ जुलै रोजी पुणे शहरात आगमन होत असल्याने पुणे शहर वाहतूक पोलिसांनी विशेष वाहतूक नियोजन लागू केले आहे. पालखी सोहळ्यादरम्यान शहरातील अनेक प्रमुख रस्त्यांवर टप्प्याटप्प्याने वाहतुकीवर निर्बंध असणार असून नागरिकांनी पर्यायी मार्गांचा वापर करण्याचे आवाहन करण्यात आले आहे.
संत ज्ञानेश्वर महाराजांची पालखी आळंदीहून वडमुखवाडी, चऱ्होली फाटा, दिघी, विश्रांतवाडी, संगमवाडी, एफ.सी. रोड, लक्ष्मी रोड, बुधवार चौक आणि नाना पेठ मार्गे भवानी पेठेतील पालखी विठोबा मंदिरात मुक्कामी पोहोचणार आहे. या मार्गावर पहाटे ३ ते सायंकाळी ८ वाजेपर्यंत आवश्यकतेनुसार वाहतूक बंद ठेवण्यात येणार आहे.
संत तुकाराम महाराजांची पालखी पिंपरी, नाशिक फाटा, दापोडी, हॅरिस पूल, वाकडेवाडी, इंजिनिअरिंग कॉलेज चौक, एफ.सी. रोड, लकडी पूल, सेवासदन चौक, लक्ष्मी रोड आणि नाना पेठ मार्गे निवडुंग्या विठोबा मंदिरात मुक्कामी पोहोचणार आहे. या मार्गावरही वेळेनुसार वाहतुकीत बदल करण्यात येणार आहेत.
वाहतूक कोंडी टाळण्यासाठी बोपोडी, खडकी, औंध, सेनापती बापट रस्ता, नळस्टॉप, कर्वे रस्ता, जहांगीर रस्ता, नेहरू रस्ता, टिळक रस्ता आणि इतर पर्यायी मार्गांचा वापर करण्याचे आवाहन पोलिसांनी केले आहे.
सकाळपासून मध्यरात्रीपर्यंत एफ.सी. रोड, फर्ग्युसन रोड, गणेशखिंड रस्ता, शिवाजी रस्ता, लक्ष्मी रस्ता, डेक्कन परिसर, बेलबाग चौक, सेवासदन चौक, भवानी पेठ आणि नाना पेठ परिसरात टप्प्याटप्प्याने वाहतुकीवर निर्बंध लागू राहतील. तसेच काही रस्त्यांवर ‘नो पार्किंग’ व्यवस्था लागू करण्यात आली आहे.
पालखी मुक्कामाच्या काळात पालखी विठोबा मंदिर, निवडुंग्या विठोबा मंदिर तसेच परिसरात कोणत्याही खासगी वाहनाला प्रवेश दिला जाणार नाही. भाविकांच्या वाहनांसाठी शहरातील विविध भागांत स्वतंत्र पार्किंगची व्यवस्था करण्यात आली आहे.
याशिवाय ९ ते ११ जुलैदरम्यान पेट्रोल आणि डिझेल टँकरच्या वाहतुकीवरही काही भागांत निर्बंध असणार आहेत. वाहतूक सुरळीत राहावी आणि गैरसोय टाळावी यासाठी नागरिकांनी प्रवासापूर्वी मार्गाची माहिती घेऊन पर्यायी रस्त्यांचा वापर करावा, असे आवाहन पुणे वाहतूक पोलिसांनी केले आहे.
