पुणे : पुण्यातील कोंढवा बुद्रुक परिसरातील टिळेकरनगरमध्ये चोरट्यांनी धुमाकूळ घातला आहे. दोन वेगवेगळ्या गृहनिर्माण सोसायट्यांमधील तब्बल आठ बंद फ्लॅट्सची कुलूपे आणि कडी-कोयंडे तोडून चोरट्यांनी सोन्या-चांदीचे दागिने आणि मौल्यवान वस्तू चोरून नेल्या. १२ नोव्हेंबरच्या मध्यरात्री घडलेल्या या सामूहिक घरफोडीच्या घटनेमुळे परिसरातील नागरिकांमध्ये भीतीचे वातावरण निर्माण झाले आहे.
टिळेकरनगर भाग एकमधील ‘आयुष हाईट्स बी’ आणि ‘अमृता होम्स’ या दोन सोसायट्यांमध्ये ही चोरी झाली. दिवाळीनिमित्त अनेक रहिवासी आपल्या मूळ गावी गेले होते. ही संधी साधून चोरट्यांनी १२ नोव्हेंबरच्या मध्यरात्री सोसायट्यांमध्ये प्रवेश केला. बंद फ्लॅट्सना लक्ष्य करत चोरट्यांनी फिर्यादी नीलेश चंद्रकांत टकले (वय ३६, रा. ओम हाईट्स, टिळेकरनगर) यांच्यासह आठ जणांच्या सदनिकांची कुलूपे आणि कडी-कोयंडे तोडले.
फ्लॅटमध्ये प्रवेश केल्यानंतर चोरट्यांनी घरातील कपाटांची कुलूपे उघडून सोन्या-चांदीचे दागिने आणि इतर मौल्यवान ऐवज चोरून नेला. एकाच रात्री आठ बंद घरांमध्ये चोरी झाल्याचे समोर आल्यानंतर परिसरात खळबळ उडाली आहे.
कोंढवा-येवलेवाडी, उंड्री आणि पिसोळी परिसरात गेल्या काही दिवसांपासून घरफोडीच्या घटनांमध्ये वाढ होत असल्याचे नागरिकांचे म्हणणे आहे. एकाच रात्री आठ फ्लॅट फोडल्याच्या घटनेमुळे रहिवासी धास्तावले आहेत. वाढत्या घरफोड्यांना आळा घालण्यासाठी पोलिसांनी रात्रीची गस्त वाढवावी, अशी मागणी नागरिकांकडून केली जात आहे.
या प्रकरणी नीलेश टकले यांनी दिलेल्या फिर्यादीवरून येवलेवाडी पोलीस ठाण्यात घरफोडीचा गुन्हा दाखल करण्यात आला आहे. परिसरातील सीसीटीव्ही फुटेज तपासून पोलीस चोरट्यांचा शोध घेत आहेत.
