पुणे, ता. 15 : पुणे शहरात अंमली पदार्थांच्या अवैध विक्रीविरोधात पोलिसांनी कारवाईचा धडाका सुरूच ठेवला आहे. गुन्हे शाखेच्या अंमली पदार्थ विरोधी पथक क्रमांक 2 ने मार्केटयार्ड परिसरात छापा टाकून तिघांना ताब्यात घेतले. या कारवाईत तब्बल 24.63 ग्रॅम वजनाचा मॅफेड्रोन (एमडी) हा अंमली पदार्थ, मोबाईल फोन, ऑटो रिक्षा आणि रोख रकमेसह एकूण 7 लाख 5 हजार 429 रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, दि. 14 नोव्हेंबर 2026 रोजी पोलीस निरीक्षक जीवन माने, सहायक पोलीस निरीक्षक अफरोज पठाण आणि त्यांच्या पथकातील कर्मचारी मार्केटयार्ड पोलीस ठाण्याच्या हद्दीत अंमली पदार्थविरोधी कारवाईच्या अनुषंगाने गस्त घालत होते.
यावेळी गुलटेकडी येथील वारणा सहकारी बँक लिमिटेडच्या इमारतीलगत, कृषी उत्पन्न बाजार समितीच्या प्रवेशद्वारासमोर, उत्सव समिती चौक ते गंगाधामकडे जाणाऱ्या रस्त्यावर एका काळ्या-पिवळ्या रंगाच्या बजाज ऑटो रिक्षामध्ये तिघे संशयास्पदरीत्या बसलेले पोलिसांच्या निदर्शनास आले.
पोलिसांनी तत्काळ तिघांना ताब्यात घेत पंचांच्या उपस्थितीत त्यांची अंगझडती घेतली. यावेळी त्यांच्याकडून 4 लाख 92 हजार 600 रुपये किमतीचा 24.63 ग्रॅम मॅफेड्रोन (एमडी), 60 हजार रुपये किमतीचा मोबाईल फोन, 1 लाख 50 हजार रुपये किमतीची ऑटो रिक्षा आणि 2 हजार 829 रुपये रोख रक्कम असा एकूण 7 लाख 5 हजार 429 रुपयांचा मुद्देमाल जप्त करण्यात आला.
या प्रकरणी पोलिसांनी सुभाषगौडा गुरन्ना चौधरी (वय 32), बाप्पू भिमा बाळशंकर (वय 28) आणि शाहरुख मेहबूब खान (वय 28, सर्व रा. मार्केटयार्ड, पुणे) यांना ताब्यात घेतले आहे.
याप्रकरणी मार्केटयार्ड पोलीस ठाण्यात गुन्हा दाखल करण्यात आला असून, अंमली पदार्थांच्या या व्यवहारामागे आणखी कोणाचा सहभाग आहे का, याबाबत पोलीस तपास करत आहेत.
अंमली पदार्थांच्या अवैध व्यवहारांविरोधात पुणे पोलिसांनी केलेल्या या कारवाईमुळे मार्केटयार्ड परिसरात खळबळ उडाली आहे.
ही कामगिरी पोलीस आयुक्त अमितेश कुमार, सह. पोलीस आयुक्त संजय दराडे, अपर पोलीस आयुक्त, गुन्हे तेजस्वी सातपुते, पोलीस उप-आयुक्त, गौहर हसन, सहाय्यक पोलीस आयुक्त गुन्हे शंकर खटके यांच्या मार्गदर्शनाखाली वरिष्ठ पोलीस निरीक्षक जीवन माने,सहाय्यक पोलीस निरीक्षक अफरोज पठाण, तसेच पोलीस अंमलदार अमोल जगताप, सतीश चव्हाण, शरद धांडे, संदिप देवकाते, योगेश मांढरे, योगेश कुंभार,पोलीस अंमलदार सुरेखा साबळे, जानवी सुर्यवशी, सुकेशिनी आंबले, पोलीस अंमलदार अजिंक्य जोजारे, अंमली पदार्थ विरोधी पथक 2, गुन्हे शाखा, पुणे शहर यांनी केली आहे.
