पुणे: पाकिस्तानी गँगस्टर शहजाद भट्टी याच्याशी सोशल मीडियाच्या माध्यमातून संपर्क असल्याच्या संशयावरून महाराष्ट्र दहशतवाद विरोधी पथकाने (एटीएस) पुणे शहर, पिंपरी-चिंचवड आणि पुणे ग्रामीण भागात मोठी कारवाई केली आहे. स्थानिक पोलिसांच्या मदतीने विविध ठिकाणी एकाच वेळी छापे टाकण्यात आले असून अनेक संशयितांची चौकशी सुरू आहे.
सूत्रांच्या माहितीनुसार, एटीएसच्या रडारवर एकूण 66 जण होते. त्यापैकी आतापर्यंत 45 जणांना चौकशीसाठी ताब्यात घेण्यात आले आहे. या व्यक्तींनी सोशल मीडियावरून शहजाद भट्टी किंवा त्याच्याशी संबंधित खात्यांशी संवाद साधल्याचा संशय व्यक्त करण्यात आला आहे. या संपर्कामागील उद्देश काय होता आणि त्यातून कोणते नेटवर्क कार्यरत होते का, याचा तपास केला जात आहे.
चौकशीदरम्यान संशयितांचे मोबाईल फोन, सोशल मीडिया अकाउंट, लॅपटॉप आणि इतर डिजिटल उपकरणांची तपासणी करण्यात येत आहे. हा संपर्क केवळ ऑनलाइन मर्यादित होता की त्यापुढे काही व्यवहार किंवा इतर संबंध होते, याची पडताळणी एटीएस करत आहे. मात्र, या कारवाईबाबत अद्याप अधिकृत माहिती जाहीर करण्यात आलेली नाही.
तपास यंत्रणांच्या प्राथमिक माहितीनुसार, बेरोजगार आणि आर्थिकदृष्ट्या दुर्बल तरुणांना जास्त पैसे आणि सहज कमाईचे आमिष दाखवून या नेटवर्कमध्ये सहभागी करण्याचा प्रयत्न होत असल्याचा संशय आहे. अशा तरुणांचा वापर गुप्त माहिती गोळा करणे, अंमली पदार्थांची तस्करी, बेकायदेशीर शस्त्रपुरवठा किंवा इतर गुन्हेगारी कारवायांसाठी केला जात असल्याची शक्यता तपासली जात आहे.
शहजाद भट्टी हा पाकिस्तानातील लाहोरचा रहिवासी असून तो परदेशातून सोशल मीडियाच्या माध्यमातून विविध नेटवर्क चालवत असल्याचा आरोप आहे. भारतीय सुरक्षा यंत्रणांनी त्याच्या हालचालींवर लक्ष ठेवले असून, या प्रकरणातून आणखी काही धागेदोरे समोर येतात का, याकडे तपास यंत्रणांचे लक्ष लागले आहे.
