पुणे: पुण्यातील बिबवेवाडी परिसरात घडलेल्या एका धक्कादायक (Pune Crime) घटनेने पुन्हा एकदा कौटुंबिक हिंसाचाराचा गंभीर प्रश्न समोर आणला आहे. चारित्र्याच्या संशयातून पत्नीची हत्या करून अपघाताचा बनाव रचण्याचा प्रयत्न करणाऱ्या पतीला पोलिसांनी अटक केली आहे. या प्रकरणात 23 वर्षीय सारिका घोडके यांचा मृत्यू झाला असून, तिचा पती शुभम घोडके याच्यावर खुनाचा गुन्हा दाखल करण्यात आला आहे. (Latest Marathi News)
ही घटना 24 मार्च रोजी घडली. सुरुवातीला पत्नी गॅलरीतून पडल्याने मृत्यू झाल्याचा दावा आरोपीकडून करण्यात आला होता. मात्र घटनास्थळावरील परिस्थिती आणि जखमांचे स्वरूप पाहून पोलिसांना संशय आला. जखमा या अपघाती पडल्यामुळे झालेल्या नसून, हल्ल्याचे स्वरूप दर्शवत असल्याचे प्राथमिक तपासात स्पष्ट झाले.
चौकशीतून समोर आलेल्या माहितीनुसार, आरोपी शुभम हा पत्नीच्या चारित्र्यावर संशय घेत वारंवार वाद घालत होता. या सततच्या संशयातून निर्माण झालेल्या तणावाचा शेवट हिंसक प्रकारात झाला. संतापाच्या भरात त्याने सारिकावर मारहाण केली आणि धारदार शस्त्राने हल्ला केला. गंभीर जखमी अवस्थेत तिला रुग्णालयात नेण्यात आले, मात्र उपचारांपूर्वीच तिचा मृत्यू झाला.
पोलिसांनी आरोपीला ताब्यात घेऊन कसून चौकशी केली असता त्याने गुन्ह्याची कबुली दिली. त्यानंतर त्याला अटक करून न्यायालयासमोर हजर करण्यात आले आहे.
