Shivaji Nagar Crime : पुणे : पुणे शहरातील शिवाजीनगर येथील जिल्हा न्यायालयाच्या आवारात दोन महिला वकिलांमध्ये मारहाणीची घटना घडली आहे. न्यायालयीन प्रकरणांवरून झालेल्या वादातून हा प्रकार समोर आला असून एका 42 वर्षीय वकिलेला दुखापत झाली आहे. या प्रकरणी शिवाजीनगर पोलिसांनी संबंधित महिला वकिलाविरुद्ध गुन्हा नोंदवला आहे.
माहितीनुसार, तक्रारदार महिला गेल्या दीड वर्षांपासून मोटर वाहन न्यायालयात वकिली करत आहेत. प्रकरणे मिळण्याच्या मुद्द्यावरून दोघींमध्ये काही दिवसांपासून वाद सुरू होता. 24 फेब्रुवारी रोजी सकाळी न्यायालयात दोघींमध्ये पुन्हा वाद झाला. दुपारी तक्रारदार न्यायालयातून बाहेर पडत असताना आरोपी महिलेनं त्यांना अडवून शिवीगाळ केली आणि मारहाण केली, असा आरोप आहे.
या दरम्यान दोघींमध्ये झटापट झाली. आरोपी महिलेने हातातील टोकदार वस्तूने डोक्यावर वार केल्याचे तक्रारीत नमूद आहे. यात जखमी वकिलेला रक्तस्त्राव झाला आणि त्यांना चक्कर आली. उपस्थितांनी तातडीने हस्तक्षेप करत जखमी महिलेला जवळच्या खासगी रुग्णालयात दाखल केले.
घटनेची माहिती मिळताच पोलीस घटनास्थळी पोहोचले. वरिष्ठ पोलीस निरीक्षकांच्या माहितीनुसार, मारहाण प्रकरणी गुन्हा नोंदवण्यात आला असून पुढील तपास सुरू आहे. न्यायालयाच्या परिसरात घडलेल्या या प्रकारामुळे वकील वर्गात चर्चा सुरू आहे.
