प्रतिनिधी अमित मुंडीक
Pune Crime: पुणे : घरफोडीच्या गुन्ह्यात मागील आठ महिन्यांपासून फरार असलेला आरोपी अखेर गुन्हे शाखेच्या युनिट 4 च्या पथकाने जेरबंद केला. ही कारवाई दि. 4 मार्च 2026 रोजी करण्यात आली.
युनिट 4 चे अधिकारी लक्ष्मीनगर पोलीस ठाण्याच्या हद्दीत प्रतिबंधक गस्त घालत असताना नानापेठेतील दुर्गा निवास अपार्टमेंट येथे घरफोडी करणारा पार्थ भांडे हा येरवडा मेट्रो स्थानकाजवळ येणार असल्याची खात्रीशीर माहिती मिळाली. त्यानुसार पथकाने सापळा रचून संबंधित इसमास ताब्यात घेतले.
चौकशीत त्याने आपले नाव पार्थ ऊर्फ सागर ज्ञानेश्वर भांडे (वय 31, रा. घोरपडी पेठ, पुणे) असे सांगितले. तपासात त्याने गुन्ह्याची कबुली दिली. समर्थ पोलीस ठाण्यात गुन्हा क्रमांक 143/2025 अन्वये त्याच्याविरुद्ध गुन्हा दाखल असून तो पाहिजे आरोपी असल्याचे स्पष्ट झाले.
सदर आरोपीस पुढील कारवाईसाठी समर्थ पोलीस ठाण्याच्या ताब्यात देण्यात आले असून पुढील तपास तेथे सुरू आहे.
ही कारवाई पोलीस उपआयुक्त (गुन्हे) श्री. निखिल पिंगळे आणि सहाय्यक पोलीस आयुक्त गुन्हे-2 श्री. राजेंद्र मुळीक यांच्या मार्गदर्शनाखाली वरिष्ठ पोलीस निरीक्षक कांचन जाधव यांच्या सूचनेनुसार पोलीस उपनिरीक्षक वैभव मगदुम, सहाय्यक पोलीस उपनिरीक्षक एकनाथ जोशी व त्यांच्या पथकाने यशस्वीरीत्या पार पाडली.
