पुणे: पुणे जिल्हा परिषदेच्या सर्वसाधारण सभेदरम्यान सोमवारी एक खळबळजनक घटना घडली. बारामतीमधील जिल्हा परिषद सदस्य मंगेश जगताप यांनी लग्नाचे आमिष दाखवून फसवणूक केल्याचा आरोप करत एका तरुणीने भरसभेत अंगावर पेट्रोल ओतून आत्महत्येचा प्रयत्न केला. मात्र, तेथे उपस्थित असलेल्या पोलिसांनी आणि सुरक्षा कर्मचाऱ्यांनी तातडीने हस्तक्षेप केल्याने मोठी दुर्घटना टळली.
मिळालेल्या माहितीनुसार, जिल्हा परिषदेची सर्वसाधारण सभा सुरू असताना विविध विषयांवर चर्चा सुरू होती. त्याचवेळी संबंधित तरुणी अचानक सभागृहात दाखल झाली. तिच्याकडे असलेले पेट्रोल तिने अंगावर ओतताच सभागृहात एकच गोंधळ उडाला. परिस्थितीचे गांभीर्य ओळखून तेथे तैनात असलेल्या पोलिसांनी आणि सुरक्षा कर्मचाऱ्यांनी त्वरित धाव घेत तिचा प्रयत्न हाणून पाडला. त्यामुळे कोणतीही जीवितहानी झाली नाही.
या घटनेनंतर संबंधित तरुणीने माध्यमांशी बोलताना मंगेश जगताप यांच्यावर गंभीर आरोप केले. गेल्या अनेक वर्षांपासून लग्नाचे आश्वासन देत आपली फसवणूक करण्यात आल्याचा दावा तिने केला. अनेकदा न्याय मिळविण्याचा प्रयत्न करूनही कोणतीही दखल घेतली गेली नाही. त्यामुळे नैराश्यातून आपण हे टोकाचे पाऊल उचलल्याचे तिने सांगितले.
घटनेनंतर पोलिसांनी तरुणीला ताब्यात घेऊन वैद्यकीय तपासणीसाठी खासगी रुग्णालयात दाखल केले. प्राथमिक माहितीनुसार तिची प्रकृती स्थिर असून पुढील चौकशी सुरू आहे.
या प्रकारानंतर जिल्हा परिषद परिसरातील सुरक्षा व्यवस्था अधिक कडक करण्यात आली आहे. प्रशासकीय इमारतीबाहेर अतिरिक्त पोलीस बंदोबस्त तैनात करण्यात आला असून, संपूर्ण घटनेचा तपास सुरू आहे. संबंधित आरोपांबाबत पोलीस सर्व बाजूंनी चौकशी करत असून, तपासानंतर पुढील कायदेशीर कारवाई केली जाणार आहे.
