पुणे: मुंबईतील जुहू परिसरात प्रसिद्ध हिंदी चित्रपट (Rohit Shetty House Firing) दिग्दर्शक रोहित शेट्टी यांच्या निवासस्थानासमोर झालेल्या गोळीबार प्रकरणात पुणे पोलिसांनी (Pune Crime) निर्णायक कामगिरी बजावत अवघ्या काही तासांत पाच आरोपींना अटक केली आहे. विशेष म्हणजे ही संपूर्ण कारवाई (Pune Crime) पुणे शहरातील वारजे, कर्वेनगर, धायरी आणि नऱ्हे परिसरात पार पडली असून, पुणे पोलिसांच्या सतर्कतेमुळे आरोपी मुंबई पोलिसांच्या तावडीत सापडले. (Pune Police)
शनिवारी 31 जानेवारी रोजी रात्री रोहित शेट्टी यांच्या घरासमोर पिस्तुलातून गोळीबार करण्यात आला होता. या घटनेत सुदैवाने कोणालाही इजा झाली नाही, मात्र एका नामवंत दिग्दर्शकाच्या घरासमोर घडलेल्या प्रकारामुळे हिंदी चित्रपटसृष्टीसह सुरक्षा यंत्रणांमध्ये खळबळ उडाली होती. या प्रकरणात गुंड लॉरेन्स बिश्नोई टोळीशी संबंधित आरजू बिश्नोई याने साथीदारांच्या मदतीने गोळीबार केल्याचा दावा समोर आला होता. समाज माध्यमांवर ध्वनीफीत प्रसारित करून या हल्ल्याची जबाबदारी स्वीकारल्याचेही समोर आले.
घटनेनंतर मुंबई पोलिस गुन्हे शाखेने तपासाची सूत्रे हाती घेत जुहू परिसरातील सीसीटीव्ही फुटेज तपासले. तांत्रिक तपासात हल्लेखोर दुचाकीवरून पसार झाल्याचे आणि ते पुण्यातील वारजे परिसरात लपल्याचे स्पष्ट झाले. ही माहिती तात्काळ पुणे पोलिस यांना देण्यात आली.
यानंतर वारजे पोलिसांनी अत्यंत नियोजनबद्ध पद्धतीने विविध पथकं तयार करून एकाच वेळी वेगवेगळ्या भागात छापे टाकले. वारजे, कर्वेनगर, नऱ्हे आणि धायरी परिसरातून सिद्धार्थ दीपक येनपुरे, समर्थ शिवशंकर पोमाजी, स्वप्नील बंडू सकट, आदित्य ज्ञानेश्वर गायके आणि अमन आनंद मराठे या पाच जणांना ताब्यात घेण्यात आले. कोणताही गोंधळ न होता ही कारवाई पार पडली, हे विशेष.
अटक केलेल्या आरोपींना पुढील तपासासाठी मुंबई पोलिसांच्या ताब्यात देण्यात आले आहे. एका हाय-प्रोफाइल गुन्ह्यात पुणे पोलिसांनी दाखवलेली तत्परता, स्थानिक माहितीचा अचूक वापर आणि समन्वयामुळे मोठा अनर्थ टळला आहे.
