पुणे: अजित पवार यांच्या (Rohit Pawar) कथित मृत्यू प्रकरणाभोवतीचे वाद अधिकच तीव्र होत असून, आमदार रोहित पवार यांनी अत्यंत गंभीर आणि खळबळजनक आरोप केले आहेत. त्यांनी थेट ‘ब्लॅकमॅजिक’ आणि राजकीय (Ajit Pawar Death) कटकारस्थानाचा मुद्दा उपस्थित करत या संपूर्ण प्रकरणाची चौकशी करण्याची मागणी केली आहे. (Maharashtra Politics)
रोहित पवार यांनी दावा केला की, अजित पवार जिवंत असताना त्यांच्या घराबाहेर काळी जादू केल्याचे प्रकार घडले होते. मुंबईतील त्यांच्या निवासस्थानाबाहेरही असेच प्रकार झाल्याचा आरोप त्यांनी केला. एवढेच नव्हे, तर त्यांच्या पक्षातील काही नेत्यांची करंगळी कापण्यात आल्याचेही त्यांनी म्हटले. “दादांची ताकद कमी व्हावी आणि ती इतरांना मिळावी, या हेतूने हे सगळं केलं गेलं का, याची चौकशी झाली पाहिजे,” असे ते म्हणाले. या संदर्भात त्यांनी अशोक खरात प्रकरणाकडेही लक्ष वेधत अंधश्रद्धा आणि राजकारण यांचा संबंध तपासण्याची गरज व्यक्त केली.
याचबरोबर त्यांनी मोठा गौप्यस्फोट करत काही महत्त्वाची कागदपत्रे आपल्या हाती लागल्याचा दावा केला. “दादांच्या पक्षातील काही कागदं आमच्याकडे आहेत. येत्या काळात आम्ही अनेक गौप्यस्फोट करू,” असे सांगत त्यांनी राजकीय घडामोडींना वेगळे वळण दिले. भाजप अजित पवारांचा पक्ष कमकुवत झाल्याचे गृहीत धरून आमदारांना आपल्याकडे खेचण्याचा प्रयत्न करत असल्याचा आरोपही त्यांनी केला. तसेच सध्याचे लक्ष दुसरीकडे वळवून राजकीय समीकरणे बदलण्याचा प्रयत्न सुरू असल्याचे त्यांनी सूचित केले.
दरम्यान, अजित पवार यांच्या मृत्यू प्रकरणी कर्नाटकमध्ये नोंदवलेल्या झिरो एफआयआरचा मुद्दाही त्यांनी उपस्थित केला. महाराष्ट्रात गुन्हा नोंदवला गेला नाही, पण कर्नाटक पोलिसांनी पुढाकार घेतल्याबद्दल त्यांनी आभार मानले. आता हा तपास महाराष्ट्रात कसा होतो, यावर आम्ही लक्ष ठेवणार असल्याचे त्यांनी स्पष्ट केले.
“हा तपास पूर्णपणे निष्पक्ष आणि पारदर्शक झाला पाहिजे. या प्रकरणामागे कितीही मोठी शक्ती असली तरी दोषींना शिक्षा झालीच पाहिजे,” असा इशारा देत रोहित पवार यांनी शेवटपर्यंत लढण्याची भूमिका स्पष्ट केली. या सर्व आरोपांमुळे प्रकरणाला राजकीय, सामाजिक आणि तपासाच्या पातळीवर नवे वळण मिळाले असून, पुढील घडामोडीकडे राज्याचे लक्ष लागले आहे.
