Pune Suicide News: पुणे : पुणे शहरात कौटुंबिक वादातून एका सलून मालकाने चौथ्या मजल्यावरून उडी मारून आत्महत्या (Suicide) केल्याची दुर्दैवी घटना घडली आहे. या प्रकरणात आत्महत्येस प्रवृत्त केल्याच्या आरोपाखाली वारजे पोलिसांनी मृताच्या पत्नीविरुद्ध गुन्हा दाखल केला आहे. या घटनेमुळे परिसरात हळहळ व्यक्त केली जात आहे.
आत्महत्या केलेल्या व्यक्तीचे नाव महेश दत्तात्रय क्षीरसागर असून त्यांचे वय 40 वर्षे होते. ते गिरीधरनगर, वारजे माळवाडी परिसरात राहात होते. महेश यांचे वडील दत्तात्रय बाबुराव क्षीरसागर यांनी वारजे माळवाडी पोलीस ठाण्यात फिर्याद दिली आहे. त्यानुसार महेश यांची पत्नी प्रतिभा महेश क्षीरसागर (वय 35, रा. शोभा हाईट्स सोसायटी, दांगट इस्टेट, शिवणे) हिच्याविरोधात गुन्हा दाखल करण्यात आला आहे. ही घटना 2 फेब्रुवारी रोजी शिवणे येथील दांगट इस्टेटमधील शोभा हाईट्स सोसायटीत घडली.
पोलिसांनी दिलेल्या माहितीनुसार, महेश क्षीरसागर यांचा शोभा हाईट्स परिसरात सलून व्यवसाय होता. सुमारे 13 वर्षांपूर्वी त्यांचे लग्न झाले होते. मात्र पती-पत्नीमध्ये अनेक दिवसांपासून वाद सुरू होते. घरगुती कारणांमुळे वारंवार भांडणे होत असल्याचे समोर आले आहे. काही महिन्यांपूर्वी प्रतिभा क्षीरसागर या माहेरी निघून गेल्या होत्या. त्यानंतर महेश यांनी त्यांची समजूत काढून त्यांना पुन्हा घरी आणले होते. तरीदेखील दोघांमधील वाद कायम होते.
या सततच्या कौटुंबिक त्रासाला कंटाळून महेश क्षीरसागर यांनी 2 फेब्रुवारी 2026 रोजी इमारतीच्या चौथ्या मजल्यावरून उडी मारून आत्महत्या केल्याचे पोलिस तपासात निष्पन्न झाले आहे. त्यांच्या मृत्यूनंतर अंत्यसंस्कार आणि धार्मिक विधी पार पडल्यावर वडिलांनी पोलिसांत तक्रार दाखल केली.
या प्रकरणाचा पुढील तपास पोलीस उपनिरीक्षक दीपाली लुगडे करीत असून घटनेशी संबंधित सर्व बाबींची चौकशी सुरू आहे.
