उरुळी कांचन, ता. 09 : पुणे–सोलापूर राष्ट्रीय महामार्गाच्या कडेला सुरक्षिततेचे नियम धाब्यावर बसवून उभारलेले एक मोठे होर्डिंग वादळी वाऱ्यामुळे कोसळल्याची घटना घडली आहे. या प्रकरणी पुणे महानगर प्रदेश विकास प्राधिकरण (PMRDA) च्या वतीने उरुळी कांचन पोलीस ठाण्यात मालकाविरुद्ध गुन्हा दाखल करण्यात आला आहे.
‘संस्कृती अँड कंपनी’चे मालक शिवाजी जाधव (पूर्ण नाव उपलब्ध नाही) असे गुन्हा दाखल करण्यात आलेल्या व्यक्तीचे नाव आहे. याप्रकरणी प्राधिकरणाचे शाखा अभियंता संकेत बाबासाहेब बडे (वय 31, रा. कोथरुड, ता. हवेली) यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, उरुळी कांचन (ता. हवेली) येथील गट नं. 354 मध्ये महामार्गाच्या कडेला शिवाजी जाधव यांनी कोणतीही शासकीय परवानगी न घेता ‘संस्कृती अँड कंपनी’चे होर्डिंग उभारले होते. 3 एप्रिल 2026 रोजी सायंकाळी साडेसात वाजण्याच्या सुमारास परिसरात जोरदार वारा आणि पाऊस झाल्याने हे अनधिकृत होर्डिंग अचानक कोसळले. सुदैवाने या घटनेत कोणतीही जीवितहानी झाली नाही, मात्र नागरिकांच्या सुरक्षेचा प्रश्न निर्माण झाला आहे.
या घटनेनंतर पीएमआरडीए प्रशासनाने तातडीने कारवाई सुरू केली. शाखा अभियंता संकेत बडे यांनी याप्रकरणी फिर्याद दाखल केली असून आरोपीने लोकांच्या जिवितास धोका निर्माण होईल अशा निष्काळजीपणे होर्डिंग उभारल्याचे नमूद केले आहे.
दरम्यान, प्रशासनाच्या तक्रारीवरून आरोपी शिवाजी जाधव यांच्याविरुद्ध भारतीय न्याय संहिता (BNS) कलम 125 तसेच महाराष्ट्र प्रादेशिक व नगररचना अधिनियम 1966 चे कलम 54 (2) अंतर्गत गुन्हा दाखल करण्यात आला आहे. पुढील तपास सुरू आहे.
