पुणे: विद्येचे माहेरघर असलेल्या पुणे शहरात पुन्हा एकदा गुन्हेगारीने डोके वर काढले असून, प्रेमसंबंधांच्या वादातून एका २४ वर्षीय तरुणाचा काटा काढण्याचा प्रयत्न झाल्याची खळबळजनक घटना मुंढवा परिसरात घडली आहे. एकाच तरुणीवर असलेल्या प्रेमाच्या हट्टापायी हा हिंसक हल्ला झाला असून, या घटनेने परिसरात दहशतीचे वातावरण पसरले आहे.
प्रवीण धनंजय माने (२४, रा. शेवाळवाडी) हा तरुण एका खासगी कंपनीत नोकरी करतो. त्याचे एका तरुणीशी प्रेमसंबंध आहेत. मात्र, त्याच तरुणीवर महेश सरोदे (३५) यालाही प्रेम होत. “तू तिच्याशी संबंध तोडून टाक, नाहीतर परिणाम वाईट होतील,” अशी धमकी सरोदेने प्रवीणला वारंवार दिली होती. मात्र, प्रवीणने या धमकीला न जुमानल्याने सरोदेचा अहंकार दुखावला गेला.
सरोदेने प्रवीणला ‘प्रकरण संपवू’ असे सांगून चर्चेसाठी बोलावून घेतले. प्रवीण तिथे पोहोचताच दबा धरून बसलेल्या सरोदे आणि त्याच्या तीन साथीदारांनी त्याला घेरले. आधी बेदम मारहाण केली आणि त्यानंतर धारदार शस्त्राने प्रवीणवर सपासप वार केले.”पोलिसांकडे गेलास तर याद राखा,” अशी धमकी देत तिथून पळ काढला.
घटनेची माहिती मिळताच मुंढवा पोलिसांनी घटनास्थळी धाव घेत गंभीर जखमी प्रवीणला तातडीने रुग्णालयात दाखल केले. वरिष्ठ पोलीस निरीक्षक स्मिता वासनिक यांच्या मार्गदर्शनाखाली पोलिसांनी वेगाने हालचाली करत मुख्य आरोपी महेश सरोदेला बेड्या ठोकल्या असून साथीदारांचा शोध पोलिस करत आहेत.
