पुणे: पुण्यात ‘पुणे ग्रँड चॅलेंज टूर २०२६’ या स्पर्धेसाठी (Pune News) प्रशासनाने शहराच्या मध्यवर्ती भागातील वाहतुकीवर निर्बंध लादले असून, उद्या सोमवार, १९ जानेवारी रोजी तब्बल ९ तास प्रमुख रस्ते बंद राहतील. उद्या सकाळी ९:०० ते सायंकाळी ६:०० या वेळेत फर्ग्युसन कॉलेज रोड, जंगली महाराज रोड आणि गणेशखिंड रस्ता हे पुण्याचे मुख्य रस्ते पूर्णपणे ‘नो-एन्ट्री झोन’ असतील. या मार्गांवर सायकली ताशी ६० किमी वेगाने धावणार असल्याने, साधी सायकल किंवा पादचारी यांनाही प्रवेश नसेल.
शर्यतीचा मार्ग नेमका कसा असेल?
खंडोजी बाबा चौक —- गुडलक चौक — तुकाराम महाराज पादुका चौक— ललित महल चौक —चाफेकर चौक — रेंज हिल्स — सिमला ऑफिस चौक — संचेती चौक — बालगंधर्व चौक— डेक्कन जिमखाना बस स्थानक
पोलीस प्रशासनाने दिलेल्या माहितीनुसार, खंडोजी बाबा चौक ते सिमला ऑफिस आणि संचेती चौक ते डेक्कन या पट्ट्यात रस्त्याच्या दोन्ही बाजूंना ‘नो-पार्किंग’ असेल. जर तुम्ही तुमचे वाहन या मार्गावर लावले, तर ते तातडीने टोईंग केले जाईल. केवळ रुग्णवाहिका आणि अत्यावश्यक सेवांसाठीच विशेष कॉरिडॉर ठेवण्यात आला आहे.
उद्याचा दिवस तर महत्त्वाचा आहेच, पण अपर पोलीस आयुक्त मनोज पाटील यांनी दिलेल्या माहितीनुसार, २३ जानेवारी रोजी स्पर्धेचा दुसरा मोठा टप्पा (९९ किमी) पार पडणार आहे. त्या दिवशी बालेवाडीपासून ते झाशी राणी चौकापर्यंतचा ५८ किमीचा भाग पुण्यातून जात असल्याने या रस्त्यावरील प्रमुख व त्यांना जोडणारे उपरस्ते वाहतुकीसाठी बंद असणार आहे.
