पुणे: मावळ तालुक्यातील सदुंबरे येथे भावांमधील न्यायालयीन वादातून धक्कादायक प्रकार घडला आहे. दिवाणी न्यायालयात सुरू असलेल्या प्रकरणाच्या रागातून एका व्यक्तीने आपल्या भावाच्या घराला पेट्रोल टाकून आग लावल्याचा आरोप आहे. या घटनेत घरातील मोठे नुकसान झाले असून सुदैवाने घरमालकाचा जीव थोडक्यात बचावला.
ही घटना 7 जून रोजी पहाटे साडेतीनच्या सुमारास घडली. संदीप गाडे हे घरात झोपलेले असताना त्यांच्या घराच्या मुख्य दरवाजावर पेट्रोल ओतून आग लावण्यात आली. आग वेगाने पसरल्यानंतर त्यांनी प्रसंगावधान राखत स्वयंपाकघराची खिडकी फोडून बाहेर पडत स्वतःचा जीव वाचवला.
या आगीत घराचा मुख्य दरवाजा, सोफासेट, लाकडी कपाट तसेच घरातील विद्युत वायरिंगचे मोठे नुकसान झाले आहे. घटनेनंतर परिसरात खळबळ उडाली.
याप्रकरणी संदीप गाडे यांनी तळेगाव एमआयडीसी पोलीस ठाण्यात तक्रार दाखल केली आहे. पोलिसांनी दिलेल्या माहितीनुसार, तक्रारदार आणि त्यांचा भाऊ गणेश गाडे यांच्यात वडगाव येथील न्यायालयात दिवाणी दावा प्रलंबित आहे. त्याच वादातून हा प्रकार घडल्याचा आरोप करण्यात आला आहे.
पोलिसांनी गणेश अनंता गाडे (वय 42) याला अटक केली असून पुढील तपास सुरू आहे.
